Symon de Rozgon, Dei et apostolice sedis gratia episcopus Wesprimiensis, locique eiusdem comes perpetuus, nobis sincere dilectis universis et singulis nobilibus in comitatu nostro Wesprimiensi constitutis, ad iudiciariam sedem de Wasarhel spectantibus et pertinentibus salutem in Domino benedictione cum paterna. Reffert (!) nobis venerabilis vir dominus Michael, abbas monasterii Beati Mauricii martiris de Beel, ordinis Sancti Benedicti, quomodo Iohannes de Zalok et Briccius de Koronthal, iudices nobilium predicti nostri comitatus Wesprimiensis, in dicta sede Wasarhel constituti in festo Beati Nicolai episcopi et confessoris proxime transacto [1428. dec. 6.] una cum Michaele Zaz dicto, exactore lucri camere regie serenitatis ac Benedicto de Pethend, vicecomite nostro, ad faciem possessionis sue abbatie et conventus Polyan vocate irruendo sex boves ipsius abbatis et suorum iobagionum de eadem depulissent, fecissentque easdem, quo eorum placuit voluntati potentia eorum mediante; preterea prefati Iohannes et Briccius, iudices nobilium, animo prefato domino abbati iniuriandi occasione non solutionis cuiusdam taxe in quoddam molendinum ipsius domini abbatis et sue abbatie in fluvio Tapolcza vocato prope possessionem Papa decurrens Adyaglyk appellatum per prefatum exactorem lucri camere contra consuetudinem hactenus observatam, indebiteque et minus iuste impositione certa birsagia seu iudiciorum gravamina sub eorum sigillis confecta et emanata contra iam fatum abbatem extradari fecissent in preiudicium eiusdem domini abbatis non modicum, dampnumque et iacturam. Quare vestras requirimus amicitias, quatenus agnita presentium notitia de et super ablatione et receptione premissorum bonorum, necnon extradatione et emanatione dictorum iudiciorum gravaminum an iuste vel iniuste per antedictos Iohannem et Briccium, iudices nobilium sit et existat conmissa et perpetrata inter vos diligenter investigando meram et omnimodam inquiratis certitudinis rei veritatem. Et si premissa agnoveritis indebite ac minus iuste fuisse perpetrata, ex tunc una cum nobile Stephano vicecomite nostro, per nos ad id specialiter destinato, prefato domino abbati ex parte dictorum Iohannis et Briccii de et super omnibus et singulis premissis, necnon dampnis et iniuriis exinde secutis meram et omnimodam iustitiam ministrare ac debite satisfactionis complementum impendere velitis atque debeatis iuxta modum et formam in talibus observari solitam et consuetam. Datum in castro nostro Wesprimiensi, feria secunda proxima ante festum Conversionis Beati Pauli apostoli, anno Domini millesimo trecentesimo vigesimo nono. [1429. jan. 24.]