Serenissimo principi domino Sigismundo, Dei gracia Romanorum regi semper augusto ac Hungarie, Bohemie etc. regi, domino ipsorum honorando conventus monasterii Sancti Martini Sacri Montis Panonie oraciones in Domino debitas ac devotas. Vestra noverit, quod cum litteras vestras annuales ad inquisiciones, evocaciones, prohibiciones, necnon ad omnia alia, que iuxta regni vestri consuetudinem de iure fieri consueverunt facienda pro religiosis viris domino fratre Mychaele abbate de Beel et conventu eiusdem loci per anni circulum generaliter datis et graciose concessis nobisque preceptorie transmissis iuxta earundem continenciam una cum Iohanne de Nagech homine vestro in prefatis litteris vestris annualibus inter alios vestros homines conscriptos expresse nominato nostrum hominem, videlicet fratrem Nicolaum, unum ex nobis ad infrascriptam inquisicionem faciendam nostro pro testimonio fidedignum duxissemus transmittendum, qui tandem ad nos exinde reversi nobis concorditer retulerunt, quod prefatus homo vester presente dicto nostro testimonio in vigilia festi Beati Andree apostoli proxime preteriti in comitatu Iauriensi procedendo ab omnibus, quibus decuisset et licuisset, nobilibus videlicet et ignobilibus ac alterius cuiusvis status et condicionis dicti comitatus hominibus palam et oculte diligenter inquirendo talem de infrascriptis scire potuisset veritatem, quod Petrus dictus Chornay de Geche, iobagio Ladislai dicti Farkas de Morochel et nobilis domine consortis eiusdem ex consensu et voluntate eorum Ladislai et domine consortis sue in anno, cuius iam quarta instaret revolucio, circa festum Beatorum Petri et Pauli apostolorum tunc preteritum manibus armatis et potenciariis ad possessionem dictorum abbatis et conventus Kayar vocatam accessisset, Briccium filium Iohannis iobagionem ipsorum abbatis et conventus, si personam ipsius reperire potuisset, miserabili nece interimere voluisset, tandem personam ipsius apprehendere nequiens grandi repletus furore boves et vaccas ac alia pecora iam dicti Briccii filii Iohannis Agustini et Mauricii iobagionum eiusdem abbatis et conventus in eadem Kayar commorancium ex peccoribus et a manibus aliorum iobagionum eorundem intra metas eiusdem possessionis Kayar segregando gravibus vulneribus sauciasset, ex quibus mox tres mortui extitissent. Hiis non contentus prefatus Petrus dictus Chornay una cum Thoma Bandi, Ambrosio filio eiusdem, Ladislao Pathonay, Valentino, Paulo filio eiusdem, Benedicto Gymolthy, Petro Fabro, Luca Bewhthes, Dyonisio filio Briccii, Stephano filio Petri, Valentino Vanyolay, Thoma Nagabw, Dominico, Iacobo filio Petri et Egidio filio Laurencii iobagionibus dictorum Ladislai dicti Farkas et domine consortis sue in dicta Geche residentibus similiter ex consensu, permissione et voluntate eorundem in anno, cuius quinta adveniret revolucio, circa festum Beati Valentini martiris tunc preteritum similiter ad possessionem dictorum abbatis et conventus Kayar predictam irruisset certos boves et vaccas ex gregibus aliorum iobagionum eorundem meliores eligendo et ad predictam possessionem Geche vocatam depelli fecisset, quosdam ex ipsis permactasset, alios, quo sue placuisset voluntati fecisset potencia sua mediante in preiudicium eorundem abbatis et conventus valde magnum. Datum septimo die diei inquisicionis premisse, anno Domini millesimo quadringentesimo tricesimo.