Serenissimo principi domino Sigismundo, Dei gracia Romanorum regi semper augusto ac Hungarie, Bohemie, Dalmacie, Croacie etc. regi, domino ipsorum gracioso conventus monasterii Sancti Martini Sacri Montis Pannonie oraciones in Domino debitas ac devotas cum perpetua fidelitate. Litteris vestris annualibus ad inquisiciones, evocaciones, prohibiciones et ad omnia alia, que talibus in processibus iuxta regni consuetudinem de iure fieri consueverunt facienda pro religioso viro domino fratre Mychaele abbate et conventu monasterii Beati Mauricii martiris de Beel per anni circulum graciose datis et concessis, nobis loquentibus suprema cum obediencia receptis, iuxta quarum continenciam una cum Thoma filio Ladislai de Chayagh, homine vestro in prefatis litteris vestris annualibus inter alios homines vestros conscriptos expresse nominato nostrum hominem, videlicet fratrem Iohannem sacerdotem, unum ex nobis fratribus conventualibus ad infrascriptam inquisicionem faciendam nostro pro testimonio duximus destinandum, qui tandem exinde ad nos reversi nobis consona voce retulerunt, quod ipsi quarto die festi Beati Gregorii pape proxime preteriti in comitatu Wesprimiensi pariter procedendo ab omnibus, quibus decens et opportunum fuisset, nobilibus videlicet et ignobilibus ac alterius status et condicionis dicti comitatus hominibus palam et occulte diligenter inquirendo talem scire potuissent veritatem, quod Benedictus Thachay dictus, Gallus de Estergar de Fenywfew una cum aliis ipsorum sociis anno preterito, videlicet circa festum Beati Andree apostoli plusquam quadraginta porcos prope monasterium pascentes reperiendo depellissent et, quo ipsorum placuisset voluntati fecissent; item Gregorius Sclavus, Benedictus Hachan de ipsa Feywfew et Clemens Hamar cum duobus filiis suis de Thezer aliisque sociis ipsorum circa festum Beati Nicolai confessoris proxime preteritum quosdam equos equaciales, videlicet viginti septem ipsorum abbatis et conventus in silva Bakon reperiendo ictibusque biccellorum et securibus gravibus vulneribus pertractassent et sauciassent, quosdam ad mortem, quosdam vero ad possessionem Fenywfew depellissent ex eisdem pociores et meliores recepissent et, quo ipsorum voluntati placuisset fecissent ac cum Iosa de Parwa inter se divisissent, residuos tamen in curia predicti Gregorii Sclavi tamdiu conservassent, quo ipsorum placuisset voluntati, videlicet ad unum mensem absque questione aliquali; et aliquanti ex ipsis equis mortui extitissent, quos ad plurimas peticiones ipsius domini abbatis et conventus reddere et restituere non curassent, erga se de presenti conservandos, preterea feria tercia proxima post festum Beati Mathie apostoli Petrus Chornay dictus una cum Iosa officiali de Parwa, Benedicto Thachay, Matheo villico, Gregorio Sclavo de predicta Fenywfw, Clemente Hamar, Georgio dicto Chal de Thezer, Anthonio, Benedicto Mez de Zenthlaclow, Ladislao Claudo de Kegery aliisque familiaribus et iobagionibus palatinalibus manibus armatis et potenciariis ad possessionem Kayar irruissent ibique triginta duos boves iobagionum ipsorum abbatis et conventus in eadem Kayar residencium ad Parwa et ad Fenywfew depellissent ex quibus unum bovem pociorem sex florenorum puri auri valentem in Fenywfw permactassent et inter se divisissent, alios idem Iosa in viginti quatuor florenorum pactando restituisset absque dampnis et expensis ac octo ex eisdem bobus usque vigesimum diem conservasset perambulando, que anichilari et destrui fecisset potencia mediante. Datum quinto die diei inquisicionis antedicte, anno Domini millesimo CCCCmo tricesimo secundo.