Capitulum ecclesie Wesprimiensis omnibus Christi fidelibus presentibus pariter et futuris presentium notitiam habituris salutem in vero salvatore. Quia accio humana simul cum tempore discurrit et labitur, ideo caute est inventum, ut ea, que in tempore aguntur, literarum patrocinio solidentur, ne falsitas preiudicet equitati et oblivio in posterum memorie valeat preiudicium generale aliquale. Hinc est igitur, quod venerabili viro domino Nicolao de Lyptovia, preposito, socioque et concanonico nostro, nostri in medio personaliter constituto, per eundem sponte fassum extitit et relatum in hunc modum, ut licet abbas Sancti Martini Sacri Montis Pannonie de Zenthmarthon et conventus loci eiusdem singulis annis in die Strennarum Domini iuxta continenciam literarum divorum, utputa Innocencii pape tercii sentencionalium et Bele regis composicionalium preposito Wesprimiensi pro tempore constituto decem marcas solvere debuerint, venerabilisque dominus Nicolaus, modernus abbas ipsius Sancti Martini et conventus loci eiusdem predicti dictas decem marcas fere quatuor annis retrolapsis propter monetarum dwkath, pridem et quarthingh nunc currencium, vocatarum vilitatem sibi minime persolverint, nichilominus tamen nunc Deo volente, intervenienteque ordinacione proborum hominum, ad talem pacis et concordie devenissent unionem: ut ipse omnem suam iniuriam, dampna factosque labores et expensas, hactenus in prosecucione cause et appelliacionis ad curiam Romanam interposite, pretextu et occasione non solucionis huiusmodi decem marcarum mote et facte eisdem domino Nicolao abbati et conventui relaxasset et indulsisset, eosdem dominum Nicolaum, abbatem et conventum super ipsis decem marcis, ab annis predictis per eos non persolutis sibi, commisisset expeditos pariter et absolutos, immo commisit quitos et expeditos coram nobis presencium vigore mediante. Datum et actum per manus honorabilis viri domini Petri de Nova, lectoris et canonici eiusdem ecclesie nostre sexto Nonas Iulii anno Domini MCCCCXXXIII, honorabilibus viris dominis [1433. júl. 2.] Iohanne de Nitria, custode, Dominico Symigiensi, Nicolas Segusdiensi, ac Iohanne de Eperyes, decano, canonicis ecclesie nostre existentibus.