Serenissimo principi domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi, domino ipsorum honorando conventus Sancti Marthini Sacri Montis Panonie oraciones in Domino debitas ac devotas. Vestra noverit serenitas litteras vestras preceptorias nobis directas suprema cum honore quo decuit nos recepisse in hec verba:||
Sigismundus, Dei gracia Romanorum imperator semper augustus ac Hungarie, Bohemie, Dalmacie, Croacie etc. rex fidelibus nostris comiti vel vicecomiti et iudicibus nobilium comitatus Wesprimiensis salutem et graciam. Dicitur nobis in persona religiosi viri, domini fratris Michaelis, abbatis monasterii Sancti Mauricii de Beel et conventus loci eiusdem, quod Stephanus Sclavus, Petrus similiter Sclavus, Symon et Anthonius familiares et iobagiones nobilis domine relicte ac magistri Thome canonici ecclesie Wesprimiensis, necnon Basi et Ladislai filiorum condam Benedicti de Debrenthe in eadem commorantes ex commissione et mandato ipsorum domine relicte ac magistri Thome, Basy et Ladislai dominorum suorum, feria quinta proxima ante festum ad Vincula Beati Petri apostoli proxime preteritum manibus armatis et potenciariis ad possessionem ipsorum domini abbatis et conventus Ganna apellatam iruendo quendam iobagionem eorum abbatis et conventus nomine Paulum dictum Benche in eadem possessione Ganna commorantem et dominam consortem eiusdem Pauli verbis illicitis et vituperiosis dehonestando diris verberum et vulnerum plagis affecissent; eo non contentus prefatus Basy una cum Georgio de Vzal, altero Georgio de Coltha, Stephano de Zerchek, Leonardo de Kisfalud, Bartholomeo castellano de Zolnak, Nicolao de Coltha, Dominico Thanko, Georgio de Swmpach, Nicolao de Hollos familiaribus, item Petro Sclavo, Simone, Anthonio, Gregorio Sartore, Stephano Sclavo, Blasio, Benedicto Suba, Petro filio Thome, Anthonio filio Mathie, Nicolao, Iohanne Sebeche, Laurencio, Emerico filiis eiusdem in Debrenthe, item Dominico Carpentario et Colomanno in Iako possessionibus commorantibus, iobagionibus scilicet suis et dictorum domine matris et fratrum suorum similiter ex consensu voluntate et instigacione ipsorum, feria sexta proxima ante predictum festum ad Vincula Sancti Petri apostoli malicia preconcepta similiter manibus armatis et potenciariis ad predictam possessionem Ganna vocatam tempore nocturnali iruendo confractis hostiis domorum iobagionum in eadem residencium universosque viros, mulieres et puellas de domibus et lectis ipsorum nudos extrahendo et verbis illicitis et vituperiosis dehonestando dire et acriter vulnerassent, quosdam denarios quatuor possessionum, Nostup videlicet Polyan, Bursud et in eiusdem Ganna in domo et in scrinio Mathei villici depositos, quos idem dominus abbas de Beel exactoribus quinquagesime et sex denarios de mandato nostro dare et aministrare debuisset similiter fracto ipso scrinio ipsius Mathei villici excepissent ipsumque Matheum villicum ac Paulum, Marcum, Andream, alterum Matheum, Thomam Sclavum et Demetrium filium Stephani in eadem Ganna possessione commorantes captivassent captivandoque alligatis eorum manibus universisque eorum rebus et bonis in domibus eorum repertis, necnon equis annualibus, vaccis, bovis ac aliis animalibus omni eorum sine culpa ablatis et ad castrum ipsorum Debrenthe asportartis et adductis ipsos iobagiones in ipsorum vinculis conservassent conservarentque eciam de presenti easdemque res et bona eorundem iobagionum ipsorum domini abbatis et conventus, quo ipsorum placuisset voluntati fecissent potencia ipsorum mediante in preiudicium ipsorum domini abbatis et conventus valde magnum. Super quo supplicacio extitit ipsis abbati et conventui per nos quid iuris remedium adhiberi. Et quia nos talis modus actus potenciarios simpliciter pertransire nolumus, igitur fidelitati vestre firmiter precipiendo mandamus, quatenus receptis presentibus et rescita comparata coram testimonio conventus ecclesie Sancti Marthini Sacri Montis Panonie, quod per eundem conventum ad id presencium per tenorem destinare iubemus, ab omnibus vicinis et commetaneis predictarum possessionum abbatis et conventus nobilibusque comprovincialibus dicti comitatus, a quibus decet et licet, ad fidem eorum Deo debitam fidelitatemque nobis et sacro nostro regio dyademati observandam de premissis meram {et} certitudinem veritatis prefatos iobagiones predictorum abbatis et conventus per anotatum Basy detentos apud ipsumque et fratres suos predictos nunc in vinculis, ut dicitur, existentes de ipsa captivacione per eosdem Basy et fratres suos libere emitti resque et bona eorum ablatos et recepta reddi et condempniter restitui faciendo ex parte eorum Basy et fratrum suorum nobilisque domine matris eorum super huiusmodi actus potenciarios memoratis abbati et conventus merum iudicium et condignam iusticiam debiteque satisfaccionis complementum iuris ordine mediante inpendere et exhibere debeatis auctoritate nostra harum serie vobis atributa et iusticia mediante secus non faciendo in premissis, seriem namque premissorum, prout expedietis sicut per vos et prefatum conventum ecclesie Sancti Martini nostre fideliter rescribi volumus maiestati. Presentes eciam perlectas reddi [...] presentanti, quas sigillis nostris absentibus sigillo fidelis nostri reverendissimi in Christo patris domini Georgii archiepiscopi Strigoniensis vicarii nostre maiestatis fecimus consignari. Datum Bude, in vigilia festi Assumpcionis Virginis gloriose, anno Domini millesimo quadringentesimo tricesimo quarto, regnorum nostrorum anno Hungarie videlicet XLmo VIII, Romanorum XXmo VII, Bohemie XV, imperii vero secundo.||
Nos itaque mandatis ipsius vestre serenitatis semper in omnibus obedire cupientes, ut tenemur, religiosum virum, dominum fratrem Petrum sacerdotem, unum ex nobis ad premissa mandata vestre serenitatis exequenda duxissemus destinandum, qui demum exinde ad nos reversus nobis retullit eo modo, ut ipse presentibus et audientibus nobilibus viris Briccio de Gych et Georgio de eadem, feria tercia proxima ante festum Beati Egidi abbatis proxime preteritum simul et invicem ab universis vicinis et commetaneis preiamfatarum possessionum Ganna, Noslop et Polyan et Bursud nobilibusque comprovincialibus prescripti comitatus ad fidem eorum Deo debitam fidelitatemque vobis et sacro vestro regio dyademati observandam de premissis meram certitudinem veritatis diligenter requisiti omnia premissa et quevis premissorum singula per pretactam dominam relictam ac magistrum Thomam canonicum ecclesie Wesprimiensis, Basee et Ladislaum filiorum condam Benedicti de Debrenthe perpetrare et omnia singula fecisse reperisset manifeste. Datum tercio die dicte inquisicionis antedicto, anno Domini supradicto.