Serenissimo principi domino eorum domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi, domino ipsorum gracioso conventus monasterii Sancti Martini Sacri Montis Panonie oraciones in Domino debitas ac devotas cum perpetua fidelitate. Litteris vestris annualibus ad inquisiciones, evocaciones, prohibiciones et ad omnia alia, que talibus in processibus iuxta regni consuetudinem de iure fieri consueverunt facienda religioso viro, domino fratre Michaele, abbate et conventui monasterii de Beel per anni circulum graciose datis et concessis nobis loquentibus suprema cum obediencia receptis, iuxta quarum continenciam una cum Michaele de Nema, homine vestro in prefatis litteris vestris annualibus inter alios homines vestros conscriptos expresse nominato nostrum hominem, videlicet religiosum virum, fratrem Nicolaum sacerdotem, unum ex nobis fratribus conventualibus ad infrascripta peragenda nostro testimonio fidedignum duximus transmittendum, qui tandem ad nos exinde reversi nobis concorditer retulerunt, quod prefatus homo vester presente nostro dicto testimonio in festo Beati Valentini martiris proxime preterito in comitatu Iauriensi procedendo ab omnibus, quibus decuisset et licuisset, nobilibus videlicet et ignobilibus ac alterius cuiusvis status et condicionis dicti comitatus hominibus palam et oculte diligenter inquirendo talem de infrascriptis scivissent veritatem, quod Blasius dictus Gery, Petrus filius Benedicti, Symon Magnus, Paulus Magnus, Benedictus Fekethw, Gregorius Koppany et Blasius Rosta iobbagiones magnificorum virorum Nicolai et Ladislai, filiorum condam magnifici Nicolai de Gara regni Hungarie palatini in possessione eorum Neger commorantes una cum aliis familiaribus et iobbagionibus eorum ex speciali mandato et voluntate dominorum eorum et induccione Doroslo de Rum officialis ipsorum in dicta Neger constituti, feria tercia proxima post festum Epiphaniarum Domini proxime preteritum manibus armatis et potenciariis ad possessionem abbatis et conventus predictorum Kayar vocatam veniendo quendam iobbagionem iam dictorum abbatis et conventus Georgium Magyar nomine, filium Nicolai non obtenta licencia nec suis debitis ac terragiis persolutis cum omnibus rebus et bonis suis ad predictam possessionem dictorum Nicolai et Ladislai de Gara Newger vocatam abduxissent moraturum potencia eorum mediante in preiudicium et dampnum ipsorum abbatis et conventus valde magnum. Datum sexto die diei inquisicionis premisse, anno Domini millesimo quadringentesimo tricesimo quinto.