Magnifico viro domino Mathius de Paloch, regni Hungarie palatino et iudici Comanorum, amico eorum honorando, capitulum ecclesie Iauriensis amicitiam paratam cum honore. Noveritis, quod cum nos receptis litteris vestre magnificentie conpositionalibus pariter et statutoriis pro partibus religiosi viri domini fratris Michaelis, abbatis ecclesie de Beel, actoris ac Mauritii, filii Symonis, filii condam Iohannis, filii bani de Marochyda, in causam attracti emanatis, nobisque amicabiliter directis, iuxta quarum continentiam una cum magistro Ladislao de Alba, notario et homine vestro in eisdem litteris vestris nominatim expresso, ad infrascriptam possessionariam statutionem faciendam de curia regia destinato, nostrum hominem, videlicet dominum Thomam de Norap, socium et concanonicum nostrum, pro testimonio duximus destinandum. Qui demum exinde ad nos reversi nobis concorditer retulerunt, quod ipsi feria quinta proxima post festum Pasce Domini proxime preteritum, [1436. ápr. 12.] termitio scilicet in dictis litteris vestris deputato, ad faciem possessionis Arpas vocate, per consequensque molendini in fluvio Rabe decurrentis et tributi ibidem exigi soliti, aliarumque utilitatum eiusdem possessionis vicinis et conmetaneis eiusdem universis inibi legitime convocatis et ipsis ac dictis domino fratre Michaele abbate actore, necnon Mauritio in causam attracto ac Georgio, filio Petri, de Dombo, avo, tutoreque et procuratore ipsius Mauritii, presentibus accessissent, statuissentque eandem possessionem Arpas cum dicto molendino tres rotas in se habenti, instrumentis ferreis et aliis attinentiis carente ac platea quinque sessiones populosas et unam desertam in se continente ex opposito ecclesie Sancti Iacobi in dicta possessione Marochyda constructe adiacente, in cuius quidem platee in uno ordine ex parte dicte ecclesie Sancti Iacobi situate in duarum sessionum populosarum una, ex parte orientis adiacente, Valentinus Parvus, filius Stephani, in alia vero seu secunda Mathias, in qua alias Martinus dictus Fenchy moram traxisset, residerent, in alio vero ordine eiusdem platee tribus sessionibus populosis et una deserta adiacente, in quarum una ex parte orientis Gregorius faber, in secunda Blasius, filius Valentini piscatoris, in tertia vero Iohannes, filius Luka, commorarentur, ceterisque omnibus utilitatibus et pertinentiis quibuslibet, terris scilicet arabilibus, pratis, silvis, rubetis, nemoribus, fenetis, aquis, aquarumque decursibus et generaliter quibuslibet utilitatibus, integritatibus prefato domino fratri Michaeli, abbati de Beel et per consequens dicte sue ecclesie, contradictione ipsorum Georgii, filii Petri et Mauritii, filii Symonis, aliorumque quorumlibet non obstante statuissent in sempiternum possidendam, tenendam et habendam, salvis predicto molendino nostro et aliis iuribus nostris in eadem Arpas habitis nobis remanentibus. Et quia statutioni dicti tributi prefato fratri Michaeli abbati fieri debende religiosus vir dominus frater Albertus, prepositus dicte ecclesie Sancte Iacobi de Marochyda, contradictione obviasset, ideo ipsi vester et noster homines eundem prepositum ad octavas festi Beati Georgii martiris nunc venturas, [1436. máj. 1.] terminum scilicet per vos assignatum, contra eosdem fratrem Michaelem abbatem ac Georgium, filium Petri et Mauritium, filium Symonis, evocassent, rationem contradictionis sue redditurum efficacem. Cuius series ad dictas octavas festi Beati Georgii martiris proxime venturas et legitime demandatas vestre magnificentie duximus rescribendas, prefatas litteras vestras compositionales sive adiudicatorias cum capite sigilli nostri inclusas vobis in specie remittendo. Datum sexto die diei possessionarie statutionis et evocationis premissarum, anno Domini millesimo quadringentesimo tricesimo sexto. [1436. ápr. 17.]