Nos conventus monasterii Sancti Benedicti de Iuxtagron memorie conmendamus, quod, cum nos ad instantem petitionem religiosi viri domini Mychaelis, abbatis monasterii Beati Maurici de Beel, una cum Francisco familiari officiali, legitimoque procuratore ipsius domini abbatis nostrum hominem, videlicet religiosum virum fratrem Nicolaum sacerdotem, unum ex nobis, nostro pro testimonio transmisissemus fide dignum, qui demum exinde ad nos reversi nobis concorditer retulerunt, quod ipsi feria secunda proxima post festum Beati Martini episcopi [1436. nov. 12.] ad opidum Baath veniendo, ibique Nicolaus Meyzner iudex, ceterique iurati cives de eadem Baath decem et septem florenos auri, quos ipsi in festo Sancti Galli proxime preterito [1436. okt. 16.] pro usu et conservatione tributi unius anni proxime preteriti memorato domino Mychaeli abbati dare et solvere habebant et debebant, prefato Francisco in persona annotati domini abbatis coram dicto nostro testimonio dederunt, solverunt. Unde annotatus Franciscus tamquam legitimus procurator eosdem iudicem, iuratus et cives de prescriptis decem et septem florenis modo premisso datis et persolutis quietos et expeditos reddidit et conmisit testimonio presentium mediante. Insuper assumpsissent prefati iudex, iurati et cives promittendo, singulis annis semper in festo Beati Galli confessoris decem et septem florenos pro usu et conservatione dicti tributi dare et solvere sine dilatione aliquali. Datum in festo Beati Briccii confessoris, anno Domini millesimo quadringentesimo tricesimo sexto. [1436. nov. 13.]