Nos Mathius de Paloch, regni Hungarie palatinus et iudex Comanorum, damus pro memoria, quod Paulus, filius Sebastiani, de Takach personaliter iuxta continentiam litterarum capituli ecclesie Iauriensis prorogatoriarum fassionalium in octavis festi Beati Michaelis archangeli [1436. okt. 6.] in figura nostri iudicii conparendo contra religiosum virum dominum fratrem Michaelem, abbatem de Beel, proposuit eo modo, quomodo idem dominus Michael abbas circa festum Beati Iacobi apostoli in anno Domini millesimo quadringentesimo vigesimo nono preteritum [1429. júl. 25.] ad possessionariam portionem suam in dicta Takach habitam transmittendo universas fruges, tam suas proprias, quam etiam iobagionum suorum, in curribus levando deportari fecisset potentia mediante in preiudicium suum valde magnum; que sic facta fore exhibitionibus trium litterarum inquisitionalium, unius conventus de Chorna et alterius capituli Iauriensis, necnon tertia vicecomitis et iudicum nobilium comitatus Wesprimiensis, domino nostro regi ad sua regia litteratoria mandata rescriptarum, sub uno sensu et forma verborum loquentium conprobans, sibi ex parte memorati domini abbatis per nos in premissis iuris equitatem petivit impertiri. Quo audito Sebastianus de Koromzo pro prefato domino fratre Michaele abbate cum procuratoriis litteris conventus Cruciferorum de Alba in nostram exurgendo presentiam respondit ex adverso, quod prefatus dominus abbas in totali premissa actione et acquisitione dicti actoris innocens esset penitus et immunis. Et quia idem Paulus sibi ac annotatus procurator dicti abbatis eidem iuxta vigores prescriptarum trium litterarum inquisitionalium iudicium et iustitiam perhiberi postularunt, pro eo nos hiis perceptis iudicantes conmisimus eo modo, ut annotatus dominus abbas quinquagesimo se nobilibus, ita videlicet, quod ipse dominus Michael abbas ob reverentiam sue abbatialis dignitatis pro decem personis nobilium in festo Beati Georgii martiris nunc venturo [1437. ápr. 24.] coram testimonio capitulo ecclesie Wesprimiensis in sua ecclesia et in suo stallo in dicta Beel habito, vestibus suis abbatialibus indutus conparendo, manumque suam dextram ad pectus suum ponendo ad conscientie sue puritatem et statum suum regularem id refere (!), quod ipse in totali premissa actione et aquisitione dicti Pauli innocens sit penitus et immunis; et tandem quadraginta persone nobilium, coniuratores scilicet sui, octavo die dicti festi Beati Georgii martiris [1437. máj. 1.] coram dicto capitulo ecclesie Wesprimiensis pro eo, quod ipse dominus abbas in totali actione dicti actoris innocens sit et existat, sacramenta prestare et dehinc ipsarum conscienciose assertionis ac iuramentalis depositionis series partes in litteris memorati capituli Wesprimiensis ad octavas dicti festi Beati Georgii martiris legittime perdurandas nobis reportare teneantur. Quia autem idem dominus abbas duas partes iudiciorum novem marcarum duplicatas nobis et tertiam partem eiusdem sine duplo parti adverse nunc persolvere debens non persolvit, ideo octavis in eisdem cum duplo persolvere teneatur. Datum Bude, quinquagesimo die termini prenotati, anno Domini millesimo quadragesimo tricesimo sexto. [1436. nov. 24.]