Serenissimo principi domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi domino ipsorum metuendo conventus Sancti Martini Sacri Montis Panonie oraciones in Domino debitas ac devotas. Vestra noverit serenitas, quod nos receptis litteris vestris annualibus sigillo vestro consignatis pro religioso viro, domino fratre Michaele, abbate ecclesie Sancti Mauricii de Beel conventuique loci eiusdem ad inquisiciones, evocaciones, prohibiciones, necnon ad omnia alia, que talibus in processibus iuxta regni vestri consuetudinem de iure fieri consueverunt facienda per anni circulum generaliter datis et graciose concessis nobis preceptorie transmissis, iuxta earundem continenciam una cum Alberto de Gycz, homine vestro inter alios homines vestros litteris vestris in eisdem conscriptos nominatim expresso, nostrum hominem, videlicet religiosum fratrem Damianum consocium nostrum conventualem ad infrascriptam inquisicionem faciendam nostro pro testimonio fidedignum duximus destinandum, qui tandem exinde ad nos reversi nobis concorditer retulerunt, quod idem homo vester presente iam dicto nostro testimonio, feria quarta proxima post festum Sancti Mauricii martiris sociorumque eius proxime preteritum in comitatu Vesprimiensi procedendo ab omnibus, quibus decuisset et licuisset, nobilibus videlicet et ignobilibus et alterius status et condicionis dicti comitatus hominibus palam et occulte diligenter de infrascriptis investigando talem scivisset veritatem, quod Dominicus de Rede, Thomas de Zan et Michael Bogathi viceofficialis de Porva ex commissione Dominici Beby de Zemere officialis de dicta Porva domini ipsorum, feria secunda proxima post festum Sancti Iacobi apostoli proxime preteritum quendam iobbagionem ipsius abbatis et conventus Briccium de Koppan in silva, intra metas possessionis Koppan reperiendo et in ipsum irruentes diris verberum plagis affecissent et captivassent captumque ad possessionem Fenefew deduxissent et bonis suis erga ipsum habitis spoliassent et tamdiu in vinculis tenuissent, quamdiu ipsorum placuisset voluntati; eo non contenti asumptis secum Mathia Koppanmonostory, nunc vero in propria residente et Petro de Lyhirth ex commissione prefati Dominici domini ipsorum in vigilia Sancti Laurencii martiris proxime preteritum manibus armatis super quendam iobbagionem ipsius abbatis et conventus, videlicet Ladislaum vilicum de dicta Koppan gregem intra metas predicte possessionis passcentem irruissent [...]que acriter verberassent barbas ac crines ipsius extrahentes ipsumque captivando ad possessionem Fenefew duxissent, et bonis suis apud ipsum habitis spoliassent et in captivitate tamdiw servassent, quousque ipsorum placuisset voluntati; hiis non contenti feria sexta proxima post festum Decollacionis Beati Iohannis Baptiste proxime preteritum quendam famulum ipsius domini abbatis et conventus Andream Parvum nomine in libera via prope Porva transseuntem prefati familiares similiter ex commissione predicti Dominici domini ipsorum in ipsum irruentes ipsumque captivassent et more latrocinio spoliassent et in captivitate et vinculis tamdiw tenuissent, quamdiu ipsorum placuisset voluntati potencia ipsorum mediante in preiudicium et dampnum ipsius domini abbatis et conventus valde magnum. Datum quarto die diei inquisicionis antedicte, anno Domini millesimo quadringentesimo tricesimo septimo.