Serenissimo principi domino Sigismundo, Dei gracia Romanorum imperatori semper augusto ac Hungarie, Bohemie, Dalmacie, Croacie etc. regi, domino ipsorum metuendo ecclesia Sancti Martini Sacri Montis Panonie oraciones in Domino debitas ac devotas. Vestra noverit serenitas, quod nos receptis litteris vestris annualibus sigillo vestro consignatis pro religioso viro domino fratre Michaele abbate ecclesie Sancti Mauricii de Beel conventuique loci eiusdem, ad inquisiciones, evocaciones, prohibiciones, necnon ad omnia alia, que talibus in processibus iuxta regni vestri consuetudinem de iure fieri consueverunt facienda per anni circulum generaliter datis et graciose concessis nobis preceptorie transmissis, iuxta earundem continenciam una cum Alberto de Gycz, homine vestro inter alios homines vestros litteris vestris in eisdem conscriptos nominatim expresso nostrum hominem, videlicet religiosum virum, fratrem Paulum sacerdotem, consocium nostrum conventualem ad infrascriptam inquisicionem faciendam nostro pro testimonio duximus fidedignum destinandum, qui tandem exinde ad nos reversi nobis concorditer retulerunt, quod idem homo vester presente iam dicto nostro testimonio, feria secunda proxima post festum Sancti Andree apostoli proxime preteritum in comitatu Vesprimiensi procedendo ab omnibus, quibus decuisset et licuisset, nobilibus videlicet et ignobilibus et alterius status et condicionis dicti comitatus hominibus palam et oculte diligenter de infrascriptis investigando talem scivissent veritatem, quod Dominicus Beby de Zemere officialis de Porva et Ieronimus dictus Kolws de Nema castellanus de Chesnek una cum Michaele de Bogathi, Thoma de Zan, Petro de Lihirth, Laurencio vicecastellano de dicta Chesnek, Michaele de Alap, Paulo de Gwg et Thoma de Peterd familiaribus ipsorum Dominici et Kolws, item Benedicto de Vamhegi et Iohanne Mathei de eadem, Iacobo, Elie de Kegeri, Georgio de Zenthlaslo et Briccio Zyw de Fenefew iobbagionibus magnifici viri Ladislai de Gara bani Maczoviensis, sabbato proximo post festum Omnium Sanctorum proxime preteritum ad possessionem Koppan ipsius domini abbatis et conventus irruissent et tres boves ab eodem ad possessionem Fenefew abduxissent et, quo ipsorum placuisset voluntati, fecissent; hiis non contenti, feria secunda proxima post festum Sancti Clementis pape proxime preteritum super possessionem predictam irruissent et ab eodem sedecim boves ad predictam possessionem Fenefew deduxissent et unum meliorem ex ipsis mactaverunt, ceteros vero, quo ipsorum placuit voluntati, fecerunt; insuper prefati Dominicus Beby et Ieronimus dictus Kolws cum ipsorum complicibus superius nominatis ex commissione magnifici viri Ladislai de Gara et bani Machoviensis, circa festum Sancti Clementis pape proxime preteritum quendam silvam ipsius domini abbatis conventus intra metas predicte possessionis Koppan habitis per iobbagiones ipsius Ladislai bani ac alios populos extraneos succidi ac anichilari fecissent potencia ipsorum mediante in preiudicium et dampnum ipsius domini abbatis et conventus valde magnum. Datum quarto die diei inquisicionis antedicte, anno Domini millesimo quadringentesimo tricesimo septimo.