Nos capitulum ecclesie Wesprimiensis memorie commendamus, quod Lucas litteratus de Arokfew et Stephanus de Gwlach familiares, legittimique procuratores religiosi viri domini fratris Michaelis, abbatis monasterii de Beel, nostram veniendo in presentiam, presente et audiente discreto viro domino Clemente presbitero, plebano parochialis ecclesie de Kayar, per modum protestationis nobis significare curaverunt, quomodo prefatus Clemens plebanus ab eo tempore, quo ipsam plebaniam tenuisset et possedisset, de tribus vineis in territorio portionis possessionarie ipsius monasterii de Beel in possessione Kayar predicta, in comitatu Wesprimiensi existenti habite, plantatis et situatis, ipsi ecclesie parochiali de Kayar, ut dicitur, testamentaliter legatis, de quibus alias ipsi domino abbati et suis predecessoribus abbatibus munera, necnon decimas et nonas vinorum possessores dictarum trium vinearum exsolvissent, huiusmodi munera ac decimas et nonas vinorum ad sepissimas ipsius domini abbatis et dicatorum decimarum et nonarum vinorum eiusdem per ipsum in dicta Kayar pro tempore constitutorum eidem domino abbati reddere et persolvere recusasset in preiudicium iuris ipsius domini abbatis et dampnum manifestum. Unde facta huiusmodi protestatione prefati procuratores et familiares prescripti domini abbatis nomine et in persona eiusdem prelibatum dominum Clementem plebanum et alios eiusdem successores plebanos coram nobis sic, ut premittitur, personaliter et facie ad faciem repertum ac alios quoslibet ipsarum trium vinearum possessores tamquam absentes a detentione, usucaptione et sibi ipsis appropriatione ulteriori dictarum decimarum et nonarum vinorum necnon munerum de iam fatis tribus vineis ipsi domino abbati et suo monasterio antefato provenire debentium aut quovis quesito colore se in earum perceptione, intromissione in sui iuris preiudicium quolibet factis vel fiendis prohibuerunt contradicendo et contradixerunt inhibendo publice et manifeste coram nobis presentium vigore et testimonio mediante. Datum in vigilia festi Beati Iacobi apostoli, anno Domini millesimo quadringentesimo quadragesimo octavo. [1448. júl. 24.]