Prelati, barones, nobiles et proceres regni Hungarie universi comiti vel vicecomiti et iudicibus nobilium comitatus Wesprimiensis salutem et favorem. Dicitur nobis in persona religiosi viri fratris Michaelis, abbatis ecclesie Sancti Mauricii de Beel, quomodo Gregorius faber et Georgius filius Luce, necnon Anthonius Ruffus, iobagiones magnifici domini Ladislai de Gara palatini in possessionibus Thezeer et Kyssagh conmorantes et iobagiones ipsius abbatis in Koppan et Basad (!) residentes pretextu quorumdam negotiorum vestri in presentiam attraxissent in causam, in qua vos idem abbas iudicibus haberet pro suspectis. Unde cum in presentiis iudicum suspectorum non sit tutum litigare, ideo vobis conmittimus, quatenus dictam causam coram vobis, ut premittitur, motam iusto iuris tramite adiudicare velitis; et si idem exponens de huiusmodi vestro iudicio contentari noluerit, ex tunc eandem causam cum totali serie vestre adiudicationis in curiam regiam, nostram in presentiam absque omni gravamine pretitulati abbatis transmittatis partibus predictis coram nobis comparendis terminum vestris in litteris prefigentes congruentem; secus non facturi. Datum Bude, feria quinta proxima post festum Nativitatis Beate Marie Virginis, anno Domini millesimo quadringentesimo quadragesimo nono. [1449. szept. 11.]