Nos Gallus et Lucas de Kayar vicecomites et iudices nobilium comitatus Wesprimiensis memorie commendamus, quod nos ad instantem et legitimam petitionem Symonis de Polyan in persona honorabilis et religiosi fratris Ladislai, abbatis de Beel, ad infrascriptam inquisitionem faciendam duximus de sede nostra iudiciaria unum ex nobis, videlicet Gregorium de Hegy in persona iudicum nobilium duxissemus destinandum. Qui tandem exinde ad nos reversus nobis retulit eo modo, quomodo ipse feria sexta proxima post festum Beate Sophie vidue proxime preteritum [1471. máj. 17.] a nobilibus et ignobilibus dicti comitatus Wesprimiensis hominibus talem scivisset certitudinis veritatem, quod Thomas de Zenthmychal et Iohannes de Kemend, castellani castri Cheznek, ex consensu et voluntate magnifici Iob de Gara, dominorum (!) scilicet ipsorum unum currum cum omnibus attinentiis et octo boves ipsum currum trahentes, tandemque familiares suos penitus et omnino despoliassent; hiis tamen minime contenti iidem castellani feria sexta proxima post festum Beati Georgii martiris similiter proxime preteritum [1471. ápr. 26.] iobagionibus prefati abbatis [in possessione] Akol commorantibus, dum ad Berenhyda ad annuale forum pro aquirendis rebus irent, ipsi castellani ad eosdem irruendo, ab ipsis duodecim boves arabiles et quatuor equos, aliasque res et bona ac arma plurima pro tunc apud ipsos repertos et inventa omnino recepissent et abstulissent, eosdemque iobagiones ipsius abbatis vulnerum plagis affecissent semivivos relinquendo, potentia mediante in preiudicium et dampnum prefati abbatis valde magnum. Datum sabbato proximo ante festum Beati Urbani pape, anno Domini millesimo quadringentesimo septuagesimo primo. [1471. máj. 18.]