Serenissimo principi domino Mathie, Dei gratia Hungarie, Bohemie, Dalmatie, Croatie etc. regi, ducique Austrie, domino ipsorum gratiosissimo, conventus Cruciferorum domus hospitalis ecclesie Beati regis Stephani de Alba orationum suffragia devotarum, perpetua cum fidelitate. Litteras magnifici domini comitis Stephani de Bathor, iudicis curie vestre serenitatis, introductorias et statutorias nobis amicabiliter loquentes et directas honore, quo decuit, recepimus in hec verba:||
Amicis suis reverendis conventui ecclesie Cruciferorum de Alba comes Stephanus de Bathor, iudex curie serenissimi principis domini Mathie, Dei gratia Hungarie, Bohemie, Dalmatie, Croatie etc. regis, ducisque Austrie, amicitiam paratam cum honore. Dicitur nobis in persona venerabilis et religiosi fratris Ladislai, abbatis monasterii Beati Mauricii episcopi et confessoris (!) in possessione Bakonbeel vocata fundati, quomodo ipse in dominium totalis predii Kys Thewel appellati ac cuiusdam portionis possessionarie in possessione Dees vocata in comitatu Wesprimiensi existentis, adiacentis et habite, ipsum exponentem et per consequens ecclesiam suam antedictam omnis iuris titulo concernentis legitime vellet introire. Super quo vestram amicitiam presentibus petimus diligenter, quatenus vestrum mittatis hominem pro testimonio fide dignum, quo presente unus ex electis nobilibus iuratis iuxta vim et formam generalis novi decreti tanquam homo regius, quem nos illac presentibus accedere petimus, ad facies prescripti predii Kys Thewel ac dicte possessionis Dees vocatarum, consequenterque antedicte portionis possessionarie in eadem Dees habite, vicinis et conmetaneis earundem universis inibi legitime convocatis et presentibus accedendo introducat prefatum Ladislaum abbatem in dominium eiusdem predii et dicte portionis possessionarie, statuatque idem et eandem eidem simul cum cunctis ipsarum utilitatibus et pertinentiis quibuslibet premisso iure sibi incumbenti perpetuo possidendas, si non fuerit contradictum; contradictores vero, si qui fuerint, evocet eosdem contra annotatum exponentem regiam in presentiam ad terminum competentem rationem contradictionis eorum reddituros; et post hec huiusmodi introductionis et statutionis seriem cum contradictorum et evocatorum, si qui fuerint, vicinorumque et conmetaneorum, qui premisse statutioni intererunt, nominibus, terminoque assignato, ut fuerit expediens, dicto domino nostro regi fideliter rescribatis. Datum Bude, feria secunda proxima post festum Beate Anne matris Marie, anno Domini millesimo quadringentesimo octoagesimo octavo. [1488. júl. 28.]||
Unde nos amicabilibus petitionibus eiusdem domini comitis Stephani annuentes, ut tenemur, una cum nobili Nicolao de Zenthiwan, uno ex electis iuratis nobilibus dicti comitatus Wesprimiensis, tanquam homine vestre serenitatis, nostrum hominem, videlicet religiosum fratrum Mathiam sacerdotem cruciferum, socium nostrum conventualem, ad premissa fideliter peragenda nostro pro testimonio fide dignum duximus destinandum. Qui tandem exinde ad nos reversi nobis uniformiter retulerunt eo modo, quomodo ipsi secundo die festi Beati Egidii abbatis proxime preteriti [1488. szept. 2.] ad facies prescripti predii Kys Tewel ac dicte possessionis Dees vocatarum, consequenterque antedicte portionis possessionarie in eadem Dees habite vicinis et conmetaneis earundem universis inibi legitime convocatis et presentibus accedendo, dumque prefatus electus iuratus ipso nostro testimonio presente prelibatum fratrem Ladislaum abbatem exponentem in dominium eiusdem predii et dicte portionis possessionarie introducere ac idem et eandem eidem statuere voluisset, tunc nobilis Ladislaus de Wsaal, castellanus de Debrenthe, in egregii Emerici Hymfy de eadem Debrenthe ac Michaelis Lethere ac Osvaldus de Eghazas Bedege in nobilium Iohannis Gegheri et Michaelis de Koronthal atque Anthonius Kassa de Wgod in venerabilis et religiosi fratris Petri, abbatis de Zyrcz, dicti predii Kys Tewel atque Colomanus de Dees in Dominici et Osvaldi de eadem Dees personis predicte portionis possessionarie in eadem Dees habite statutionibus contradictionis velamine obviassent; ob quam quidem contradictionis inhibitionem idem dictus iuratus ipso nostro testimonio presente ibidem et eodem die eosdem, Emericum Hymfy, Michaelem Lethere, necnon Iohannem Gegheri, Michaelem de Koronthal et fratrem Petrum abbatem atque Dominicum et Osvaldum de Dees contra annotatum fratrem Ladislaum abbatem exponentem ad octavas festi Beati Michaelis archangeli nunc venturas [1488. okt. 6.] vestram regiam evocasset in presentiam rationem contradictionis eorum reddituros. Datum vigesimo die diei introductionis, statutionis et evocationis predictarum, anno Domini supradicto. [1488. szept. 21.]