Spectabili et magnifico domino Stephano de Zapolya, comiti perpetuo terre Scepusiensis, regni Hungarie palatino et iudici Comanorum, domino eorum honorando conventus Cruciferorum domus hospitalis ecclesie Beati regis Stephani de Alba amicitiam paratam cum honore. Vestra noverit s[pectabilis] m[agnificentia] nos litteras eiusdem inquisitorias, evocatorias ac insinuatorias nobis preceptorie loquentes et directas honore, quo decuit recepisse in hec verba:||
Amicis suis reverendis, conventui ecclesie Cruciferorum ecclesie Beati regis Stephani de Alba Stephanus de Zapolya, comes perpetuus terre Scepusiensis, regni Hungarie palatinus et iudex Comanorum, amicitiam paratam cum honore. Dicitur nobis in personis providentium et circumspectorum iudicis et iuratorum, ceterorumque civium civitatis Alberegalis, quomodo circa festum Purificationis Beate Marie virginis proxime preteritum [1497. febr. 2.] circumspectus Petrus Zendy et Michael Lewrynthe, concives eorumdem exponentium, cum duobus curribus eorum salibus oneratis cum sedecim bobus eosdem currus trahentibus versus opidum Papa vocatum ad nundinas seu forum in eodem celebrari solitum proficisci habuissent, et dum ad termina possessionis abbatis de Beel, Koppan vocate, in comitatu Wesprimiensi existentis habite pervenissent, tunc egregius Anthonius de Pok, nescitur quo ductus motivo, eosdem, ut prefertur, currus salibus oneratos cum ipsis sedecim bobus eosdem currus trahentibus in territorio seu campo dicti possessionis Koppan repertos sine dicta ratione potentialiter recipi, auferri, abigique et ad eandem possessionem Koppan deduci ac tandem in manus cuiusdam Dominici, villici dicti abbatis de Beel in eadem Koppan constituti, dedisset et assignasset; quos quidem currus simul cum dictis bobus, aliisque rebus pro tunc ab eisdem Petro et Michaele concivibus dictorum exponentium prefatus abbas dicte ecclesie de Beel ad sepissimas petitiones et requisitiones eorumdem exponentium pretactis Petro et Michaeli concivibus eorum minime reddere et restituere curavissent, neque curarent (!) etiam in presentiarum potentialiter erga se conservando, in quibus premissis eisdem Petro et Michaeli concivibus dictorum exponentium plus quam trecentorum florenorum auri dampnum intulissent potentia mediante in preiudicium et dampnum dictorum exponentium valde magnum.||
Et quia tempore recessus serenissimi principis domini Wladislai, Dei gratia Hungarie, Bohemie etc. regis, domini nostri gratiosissimi de hoc regno Hungarie versus regnum suum Bohemie, antequam iter suum arripere voluisset, de consilio et conmuni voluntate dominorum prelatorum, baronum, procerumque huius regni sui eotunc penes suam maiestatem constitutorum et existentium pro quietiori, commodiorique et tutiori statu et conservatione huius regni sui inter cetera statuendo decrevit, ut ratione quorumcumque actuum potentiariorum, dampnorum, illationum, ceterorumque quorumvis malorum generum ab ipso tempore statuti sue maiestatis per quempiam committendorum non obstante decreto huius regni sui infra felicem sue maiestatis reditum breves evocationes ad tricesimum secundum diem iuxta veterem consuetudinem decerni et dari atque universe cause, ut prefertur, ratione quorumcunque actuum potentiariorum et malorum generum post octavum diem festi Epiphaniarum Domini iam elapsi semper usque felicem sue maiestatis reditum movende absque omni ulterioris prorogationis confidentia per nos ac magistros prothonotariorum per suam maiestatem ad id deputatos, adiudicari ac sententionaliter, finaliterque terminari possint et deberent, amicitiam itaque vestram presentibus petimus diligenter, quatenus vestrum mittatis hominem pro testimonio fide dignum, quo presente Barnabas de Sary, aut Ladislaus, filius eiusdem, vel Franciscus Anyos de Fayz, sin Nicolaus Anyos de eadem, seu Thomas Pan de Kayar, sive Simon Iwanka de Wamus, sive Georgius de Iwthas, aliis absentibus homo noster de curia regia per nos ad id specialiter transmissus, scita prius premissorum omnimoda veritate, evocet prefatos Anthonium Poky ac abbatem de Beel contra annotatos exponentes ad tricesimum secundum diem evocationis exhinc fiende in curiam regiam, nostram scilicet palatinalem in presentiam, rationem de premissis reddituros efficacem, litis pendentia, si qua foret inter ipsos non obstante, prescriptumque Dominicum villicum, iobagionem dicti abbatis, eidem statuere committendo, insinuando eisdem, ut sive ipsi in huiusmodi termino, tricesimo scilicet secundo die evocationis antedicte, coram nobis compareant, prefatusque abbas iobagionem suum statuat, sive non, nos ad partis comparentis instantiam iuxta statuta dicti domini nostri regis, prelatorum suorum et baronum super inde facta, absque ulterioris prorogationis confidentia finem debitum et indilatum faciemus causa in premissa, prout dictaverit ordo iuris. Et post hec huiusmodi inquisitionis, evocationis et insinuationis seriem cum nominibus evocatorum ad tricesimum secundum diem evocationis exhinc fiende nobis amicabiliter rescribatis. Datum Bude, feria quarta proxima post festum Beati Ambrosii confessoris, anno Domini millesimo quadringeritesimo nonagesimo septimo. [1497. ápr. 5.]||
Et iuxta earumdem continentiam una cum prefato nobili Thoma Pan de Kayar, homine vestro palatinali de curia regia per v[estram] m[agnificentiam] ad id specialiter transmisso, nostrum hominem, videlicet religiosum fratrem Anthonium sacerdotem cruciferum, socium nostrum conventualem, ad premissa fideliter peragenda nostro pro testimonio fide dignum duximus destinandum. Qui tandem exinde ad nos reversi nobis concorditer retulerunt eo modo, quod ipsi feria quinta proxima ante festum Beatorum Thyburtii et Valeriani martirum proxime preteritum [1497. ápr. 13.] in dicto comitatu Wesprimiensi simul procedendo ab omnibus nobilibus et ignobilibus boni status et honeste conditionis eiusdem comitatus hominibus, a quibus decens et opportunum fuisset, palam et occulte de prenarratis diligenter inquirendo omnia premissa et quevis premissorum singula sic et suo modo facta fuisse et esse rescivissent, prout eidem v[estre] m[agnificentie] dictum extitisset et quemadmodum tenor litterarum eiusdem per omnia contineret prescriptarum; facta itaque premissa inquisitione eodem die prefatus homo v[estre] m[agnificentie] ipso nostro testimonio presente venerabilem et religiosum fratrem Ladislaum abbatem de predicta Beel in preallegata possessione sua Koppan, memoratum vero Anthonium de Pok in possessione Zewch, in eodem comitatu Wesprimiensi existens, officiolatu scilicet suo in eadem possessione Zewch habito, contra annotatos iudicem, iuratosque et ceteros cives civitatis Alberegalis exponentes ad tricesimum secundum diem diei evocationis exhinc facte computando in curiam regiam, vestram scilicet palatinalem evocasset in presentiam rationem de premissis redditurum efficacem, litis pendentia, si qua foret inter ipsos non obstante, prescriptumque Dominicum villicum, iobagionem dicti abbatis eidem statuere commitendo, insinuando ibidem eisdem, ut sive ipsi termino in predicto coram vobis compareant, prefatusque abbas iobagionem suum predictum statuat, sive non, vos ad partis comparentis instantiam iuxta statuta domini nostri regis, prelatorumque suorum et baronum superinde facta absque ulterioris prorogationis confidentia finem debitum et indilatum facietis causa in premissa, prout dictaverit ordo iuris. Datum sexto die diei inquisitionis, evocationis et insinuationis predictorum, anno Domini supradicto. [1497. ápr. 18.]||
[Hátjegyzet]: Sabbatho proximo ante festum Penthecostes Benedictus de Gyewry procurator honorabilis abbatis de Beel comparuit.