Alexander episcopus, servus servorum Dei, dilecto filio Matheo Toalna clerico Quinqueecclesiensi salutem et apostolicam benediccionem. Exigentibus meritis tue devocionis, quam ad nos et apostolicam sedem gerere comprobaris, inducimur, ut te specialibus favoribus et graciis prosequamur. Cum itaque nos hodie intendamus de persona tua nobis et fratribus nostris ob tuorum exigenciam meritorum accepta monasterio Sancti Martini Sacri Montis Panonie Ordinis Sancti Benedicti Iauriensis diocesis ad presens certo modo vacanti de fratrum eorundem consilio pro videre teque illi in abbatem preficere, nos cupientes tuis condicionibus in premissis oportune providere teque a quibuscunque excommunicacionis, suspensionis et interdicti aliisque ecclesiasticis sentenciis, censuris et penis a iure vel ab homine quavis occasione vel causa latis, si quibus quomodolibet innodatus existis, ad affectum presencium dumtaxat consequendum harum serie absolventes et absolutum fore censentes motu proprio, non ad tuam vel alterius pro te nobis super hoc oblate peticionis instanciam, sed de nostri mera liberalitate tecum, ut eidem monasterio, eciam habitu regulari non suscepto et professione per monachos dicti monasterii emitti solita non emissa, sed clericus secularis existens per tres menses dumtaxat a datis presencium computandos, ita tamen, quod interim habitum suscipere et professionem huiusmodi emittere tenearis, in abbatem prefici, illudque in spiritualibus et temporalibus regere et gubernare libere et licite valeas, quibusvis constitucionibus et ordinacionibus apostolicis ac monasterii et Ordinis et predictorum iuramento, confirmacione apostolica vel quavis firmitate alia roboratis, statutis et consuetudinibus ceterisque contrariis nequaquam obstantibus, auctoritate apostolica tenore presencium de specialis dono gracie dispensamus. Volumus autem, quod infra dictos tres menses habitum suscipere et professio nem huiusmodi emittere omnino tenearis. Alioquin dictis tribus mensibus elapsis monasterium [relinque]re decerminus per presentes eo ipso. Nulli ergo omnino hominum liceat hanc paginam nostre absolucionis, dispensacionis et voluntatis infringere [vel ei ausu temerario contr]aire. Si quis autem hoc attemptare presumpserit indignacionem omnipotentis Dei ac Beatorum Petri et Pauli apostolorum eius se noverit incursurum. Datum Rome apud Sanctum Petrum anno incarnacionis dominice millesimo quingentesimo quarto decimo Kalendas Octobris, [1500. szept. 18.] pontificatus nostri anno nono.