Nos universitas nobilium comitatus Iauriensis damus pro memoria, quod cum nos sabbato proximo ante festum Beati Barnabe apostoli proxime preteritum [1500. jún. 6.] in civitate Iauriensi in sede nostra iudiciaria consedissemus, de medio aliorum nobilium, consociorum videlicet nostrorum, egregius Mathias Was de Dynnye, castellanus castri Sancti Martini Sacri Montis Pannonie et nobilis Benedictus Borsos, homines videlicet et familiares venerabilis domini Mathei electi abbatis ecclesie Sancti Martini de ipso monte Pannonie in nostram exurgentes presenciam in persona ipsius domini abbatis per modum protestacionis nobis significare curaverunt, quomodo homines et familiares egregii Emerici Czobor, camararii regie maiestatis, in dicta civitate Iauriensi constituti nundinas seu fora in civitate eiusdem domini abbatis Zenthmarthon vocata celebrari solitas et consueta sepius infestare consuevissent salesque forisancium, emencium scilicet et vendencium, in ipsa civitate contra libertates dicte ecclesie Sancti Martini per Sanctum Stephanum primum regem Hungarie et ceteros dominos reges eidem concessas et per summos pontifices confirmatas recipere et asportare niterentur in preiudicium scilicet et dampnum prefati domini abbatis et derogamen iuris dicte ecclesie sue manifestum. Unde facta huiusmodi protestacione prefati Mathias Was et Benedictus Borsos in persona eiusdem domini prefati domini abbatis nos requisitos et rogatos effererunt (!), ut nos libertates seu consuetudines illius civitatis Zenthmarthon, quas sciremus, in nostris literis conscribi facere et eidem domino abbati dare dignarentur ad cautelam. Et quia talis sit libertas et consuetudo illius civitatis Zenthmarthon, quas nos scimus et vidimus et a genitoribus quoque nostris audivimus, ut in ipsam civitatem Zenthmarthon et nundinas ac fore in eadem celebrare solitas et consueta cuncti et universi homines forisantes semper sales eorum de undique partibus huius regni Hungarie libere importassent et vendidissent, nec unquam officiales et camerarii illos vendestes et ementes quoquomodo porturbare et impedire ausi fuissent et neque camera salium ille ex consuetudine regni extitisset, ad quorum fassiones, perticiones presentes literas nostras eidem domino abbati duximus concedendas. Datum in dicta civitate Iauriensi sabbato inter octavas festi Sacratissimi Corporis Christi, anno eiusdem millesimo quingentesimo. [1500. jún. 20.]