Vanelmus de Heyck, Dei et apostolice sedis gratia monasterii Beate Marie Lutzenburgensis abbas Ordinis Sancti Benedicti Treverensis diocesis eiusdemque ac Cluniacensi ordinum in spiritualibus et temporalibus reformator, visitator, corrector atque iudex generalis a sancta sede apostolica delegatus et generaliter deputatus, reverendo patri domino Mathee de Tholna, abbati monasterii Sancti Martini in Monte Pannonie Ordinis Sancti Benedicti Iauriensis diocesis salutem in Domino sempiternam. Exhibita pro parte vestra peticio continebat, quod exquo complexionis debilitate esu carnium difficulter carere possetis et pro intensis frigoribus obviandis maxime nocturno tempore vestes consuete et pelles domestico non sufficerent, instancius postulatis, quatenus specialem graciam facientes vulpinis pellibus indui ac dominicis et quintis feriis, dum nature debilitas id exposceret, carnibus vesci possetis, indulgere dignaremur. Et licet carnium esus ac felles venatice monachis interdicantur de iure, nos tamen loci et persone vestre qualitatibus perspectis inclinati, ut nocturno tempore de collo et dorso vulpium pellicio seu foderatura, dum tamen foris non videatur; ac dum corporalis debilitas id requirit, tribus vicibus in hebdomeda extra tamen adventum et septuagesimam carnibus maxime bipedum uti possitis secrecius tamen, ne proximus, quem edificare debet quilibet bonus Christianus quanto magis ergo religiosus, scandalisetur, apostolica auctoritate nobis in hac parte tradita concedimus ac misericorditer dispensamus. In quorum omnium premissorum fidem et testimonium presentes literas fieri et per notarium publicum infrascriptum subscribi sigillique nostre iurisdiccionis oblongi iussimus et fecimus appensione communiri. Datum Romae in domo habitacionis nostre anno salutis millesimo quingentesimo, indiccione tercia, die quarta mensis Octobris, pontificatus sanctissimi domini nostri domini Alexandri pape sexti anno nono. [1500. okt. 4.]||
Ghysbertus Ghysberti de Bremel, notarius publicus de mandato scripsit. gg.