Petrus, miseracione divina tituli Sancti Ciriaci in Thermis sacrosancte Romane ecclesie presbyter cardinalis Reginus ad Hungarie ... etc. apostolice sedis legatus, dilecto nobis in Christo Matheo, abbati monasterii Sancti Martini in Pannonia, Ordinis Sancti Benedicti, Iauriensis diocesis, salutem in Domino sempiternam. Ut erga sedem apostolicam et nos eo amplius crescat tue devocionis affectus, quo eam et nos benigniores inveneris tibi faciendo graciam specialem, porrectis nobis ex parte tua supplicacionibus, quantum cum Deo possumus benignius, annuentes auctoritate apostolica, qua fungimur in hac parte, ut a quocunque antistite graciam et communionem sedis apostolice habente, ad omnes eciam sacros et presbyratus ordines aliquibus diebus dominicis vel festivis successive, eciam extra tempora a iure statuta, libere promoveri ac munus benediccionis in presentia duorum aut trium abbatum vel episcoporum recipere et in ipsis ordinibus per te receptis postmodum licite ministrare valeas.||
Tecum alio tibi non obstante canonico tenore presencium nunc dispensamus ac tibi et antistiti ordinanti ac munus benediccionis huiusmodi conferenti super premissis licenciam impartimur et liberam concedimus facultatem. Constitucionibus et ordinacionibus apostolicis ... non obstantibus quibuscunque.||
Datum Bude, Vespermiensis (!) diocesis, sub nostro sigillo, anno incarnacionis dominice MDI, octavo Kal. Aprilis, pontificatus sanctissimi in Christo patris et domini nostri domini Alexandri divina providencia pape sexti anno nono. [1501. márc. 25.]