Nos universi abbates in capitulo generali in monasterio Sancti Martini Sacri Montis Pannonie celebrato existentes iuxta huius Ordinis consuetudinem ad visitandum omnes abbatias tocius regni certos dominos abbates de medio nostri delegimus, inter quos hos venerabiles, dominum Stephanum, abbatem monasterii Sancti Adriani martyris de Zalawar et fratrem Petrum praedicatorem ad vos et in medium vestri visitandos deputavimus, dantes eis plenum facultatem et auctoritatem, tum vigore literarum serenissimi domini nostri regis et reverendissimi domini Petri Regini cardinalis et legati de latere, tum vero Ordinis et capituli, ut omnes et singulos abbates visitent et examinent de eorum vita, moribus et conservacione ac discipacione (!) seu reformatione bonorum ecclesie. Contumaces autem et rebelles et male vite puniant, castigent tam temporali quam spirituali pena et potissimum proprietarios excommunicent et suspendant ab omni officio, tamdiu, donec ad vere vite et regularis observancie vigorem se[paratos?] fore et esse didicerimus. Racione autem contumacie ex quo capitulum intrare [neglexer]int, convincantur pena iuxta Benedicti duodecimi et Onorii tertii in dupplo expensarum, quas in veniendo ad ipsum synodum et ibidem inmorando et redeundo fecissent. Et ex nunc visitatores sub excommunicationis pena late sentencie exolvere teneantur harum vigore et testimonio literarum mediante. Datum in Sancto Martino capitulo pretacto feria secunda proxima post festum Beati Georgii martyris anno Domini millesimo quingentesimo primo. [1501. ápr. 26.]