Nos conventus monasterii Sancti Martini Sacri Montis Pannonie memorie commendamus, quod religiosus frater Iohannes Horwath, ordinis nostri Sancti Benedicti, in monasterio ecclesie Sancti Maurici de Beel degens, in sua et totius conventus dicte ecclesic de Beel ad nostram personaliter veniens presentiam per modum protestationis nobis significare curavit in hunc modum, quomodo hiis diebus noviter elapsis nobilis Iohannes Thermes dictus de Felpecz in dicto monasterio ecclesie de Beel minus iustas et indebitas effusiones sanguinis irritaverit et fecerit et tandem exinde idem Iohannes Thermes a venerabile domino Ladislao, prelato et abbate ipsorum, super huiusmodi minus iustas et indebitas effusiones sanguinis litteras quitantias et expeditorias habere et retrahere vellet. Propterea facta huiusmodi protestatione prenominatus religiosus frater Iohannes sui et prenotati conventus ecclesie de Beel nominib[us] prelibatum venerabilem dominum Ladislaum, prelatum et abbatem ipsorum, ab huiusmodi [da]tione et donatione litterarum quitantiarum et expeditoriarum dicto Iohannis Thermes d[atis] et donatis prohibuisset et inhibuisset contradicendo, immo prohibuit et contradix[it inh]ibendo coram nobis, donec et quousque prefatus Iohannes Thermes eandem ecc[lesiam ips]orum de Beel reconciliare et in pristinum statum, honoremque et decentiam per suas [expensa]s et labores redigi faciet et curabit, harum nostrarum litterarum vigo[re et testimo]nio presentium mediante. Datum feria secunda proxima ante festum Beati Lau[rentii martiris] anno Domini millesimo quingentesimo primo. [1501. aug. 9.]