Serenissimo principi et domino domino Wladislao, Dei gracia regi Hungarie, Bohemie etc domino ipsorum naturali gloriosissimo conventus monasterii Sancti Egedii de Simigio oracionum suffragia devotarum perpetua cum fidelitate. Vestra noverit serenitas, nos literas eiusdem preceptorias comiti vel vicecomiti iudicibus nobilium comitatus Simigiensis loquentes et directas nosque in certa sui parte tangentes summpo cum honore recepisse in hec verba:||
Wladislaus, Dei gracia rex Hungarie et Bohemie etc. fidelibus nostris comiti vel vicecomiti et iudicibus nobilium comitatus Simigiensis salutem et gratiam. Expositum est maiestati nostre in persona fidelis nostri venerabilis Mathei, abbatis ecclesie Sancti Martini Sacri Montis Pannonie, qualiter superioribus diebus in quadam causa inter nobilem Briccium Ispan, officialem ipsius exponentis de Remethewdwarhel in persona eiusdem abbatis ab una, ac prudentes et circumspectos iudicem et iuratos ceterosque cives et inhabitatores civitatis nostre Albensis ab alia partibus racione et pretextu introduccionis et impulsionis quorundam scilicet curruum providorum Martini Mezaros et Georgii aurifabri, inhabitatorum eiusdem civitatis nostre Albensis, simul cum bobus eosdem currus trahentibus per familiares eiusdem Bricci Ispan de via inter possessiones Nylas et Kezy vocatas habita, necnon certarum rerum ablacionis ab non acceptam licenciam ab exactoribus pecuniarum sigillarium, ipsius exponentis in possesione Som vocata, in eodem comitatu vestro habita exigi solitarum, de qua quidem via tam prefati cives Albenses, quam eciam inhabitatores possessionis Zokol appellate semper et ab antiquo exactoribus pecuniarum dicti exponentis sigillarium se ad acceptandam licenciam presentare obligati fuissent, mota et exorta per nobiles Valentinum de Begethe, Iohannem Nyari, Urielem similiter Nyari, Benedictum de [Th]abod, Petrum de Petthend, Andream Thybocz, Gregorium Draskay, Laurencium Nagh de Thard, iudices et arbitros per ipsos partes electos equaliter certa revisio et adiudicacio facta fuisset, idque per eosdem iudicialiter conclusum extitisset, quod prefatus Briccius Ispan in persona dicti abbatis, domini sui hoc probare debeat, quod prefati cives Albenses ac eciam inhabitatores prefate possessionis Zokol de pretacta via, inter prescriptas possessiones Nylas et Kezy habita ad acceptandam licenciam prefatis exactoribus pecuniarum sigillarium memorati exponentis se semper presentare astricti fuissent. Ob hoc ipsi exponenti attestacionibus nobilium et ignobilium dicti vestri comitatus pro evictione iuris sui summe foret necessarium. Ideo fidelitati vestre harum serie firmiter committimus et mandamus, quatenus acceptis presentibus unum ex vobis, puta iudicem nobilium, transmittatis, qui coram testimonio conventus ecclesie Simigiensis, quod illac ad id serie presencium transmitti iubemus, ab omnibus nobilibus et ignobilibus boni scilicet status et honeste condicionis, utriusque sexus hominibus ad fidem eorum Deo debitam fidelitatemque nobis et sacre corone nostre observandam sciant, inquirant et experiantur meram, plenam atque omnimodam certitudinis super eo veritatem, an scilicet prefati cives Albenses, necnon prefati inhabitatores dicte possessionis Zokol de via prenarrata dictis exactoribus pecuniarum sigillarium prefati exponentis se presentare et licenciam ab eisdem accipere astricti fuerunt necne. Et tandem habita fassione et attestacione eorundem totam seriem ipsius attestacionis cum attestancium nominibus ad fassionem dictorum vestri iudicum nobilium ac testimonii eiusdem conventus Simigiensis per eundem conventum maiestati nostre presentibus rescribi volumus et mandamus. Secus igitur non facturi, presentibus perlectis exhibenti restitutis. Datum Bude sabbato proximo ante festum Sancte Trinitatis, anno Domini millesimo quingentesimo secundo. [1502. máj. 21.]||
Et iuxta continenciam earundem unacum nobili Laurencio Bybo de Moth, uno ex iudicibus nobilium dicti comitatus Simigiensis, nostrum hominem videlicet religiosum fratrem Gallum sacerdotem unum ex nobis ad premissa fideliter peragenda nostro pro testimonio fide dignum duximus destinandum, qui tandem exinde ad nos reversi nobis sub iuramento eorum concorditer retulerunt eo modo, quod ipsi die dominica proxima post festum Beate Margarethe virginis et martyris proxime preteritum [júl. 17.] ad possessionem Gellye vocatam simul accendentes ibique nobiles ... in possesionibus predictis commorantes illac per prefatum Briccium Ispán insimul convocati et congregati, ad fidem eorum Deo debitam fidelitatemque vestre serenitati et sacre corone eiusdem observandam unanimi ac concordi testificacione coram ipsis iudice nobilium et nostro testimonio taliter fassi et attestati extitissent, quod scilicet prefati cives Albenses, necnon prefati inhabitatores dicte possessionis Zokol de via prenarrata dictis exactoribus pecuniarum sigillarium prefati exponentis se presentare et licenciam ab eisdem accipere semper astricti fuissent. Seriem itaque premisse attestacionis cum attestancium nominibus ad fassionem prefatorum iudicis nobilium et nostri hominis vestre serenitati fideliter duximus rescribendam. Datum septimo die diei attestacionis prenotate, [1502. júl. 23.] anno Domini supradicto.