Reverendus in Christo pater dominus Matheus, Dei et apostolice sedis gracia abbas monasterii Sancti Martini Sacri Montis Pannonie Ordinis Sancti Benedicti ac eiusdem Ordinis per regnum Hungarie visitator generalis in foribus huius alme ecclesie seu monasterii Pechwaradiensis per hoc presens publicum edictum valvis seu foribus huius monasterii affixum monet et requirit eiusdem monasterii Pechwaradiensis gubernatorem, economum, priorem et conventum, quatinus ipsi infra sex dierum spacium a die affixionis presencium ad predictas fores de ipsis fiendis computando, quorum dierum spacium ipsis pro primo, secondo, tercio et ultimo et peremtorio termino, monicioneque canonica et sub infrascriptis sentenciarum penis eisdem prefigit et assignat, quatenus illos sex florenos auri, quibus ipsi racione visitacionis sue ex legitima et laudabili, antiquaque et hactenus observata consuetudine eidem domino Matheo visitatori generali debentur, eidem aut suo homini ad hoc deputato et transmisso plenarie et ex integro restituere et persolvere debeant et teneantur, alioquin dicto sex dierum termino sive spacio evoluto, idem dominus Matheus abbas et visitator generalis in ipsos et eorum quemlibet coniunctim et divisim singulariter et in singulos ab in gressu templi interdicti ecclesiastici ac suspensionis a divinis, necnon in eorum monasterium et conventum sive capitulum similiter interdicti ecclesiastici sentencias auctoritate sua, qua fungi dinoscitur, fert in his scriptis et eciam promulgat. Relaxacionem vero omnium premissorum sibi tantummodo et dicto homini ad levandum huiusmodi debitum directo reservat. Datum in arce nostra Sancti Martini Sacri Montis Pannonie, quindecima die mensis Octobris, anno Domini millesimo quingentesimo tertio. [1503. okt. 15.]