Nos Blasius de Koppan Monostra et Gregorius de Thatha abbates Ordinis Sancti Benedicti Iauriensis ac Sebastianus de Zeredahel, arcium liberalium magister, Wesprimiensis dyocesis presencium tenore omnibus eum habentibus significamus, quod discretus dominus Sebastianus, plebanus de Zarzo, dyocesis dicte Wesprimiensis, spiritualis vero iurisdictionis monasterii Sancti Martini Sacri Montis Pannonie coram nobis oraculo vive vocis in specie spontanea ipsius voluntate et nemine exagitante fassus et perlatus (!) est hec subsequencia, ut sequentur et per hec verba:||
Quod ecclesia sua parochialis in prefata possessione Zarzo sita et fundata perhenniter et ab evo fuisset et esset ymmo et in presenciarum pertineret iurisdiccioni ipsius monasterii Sancti Martini pertinereque et spectare dignosceretur, tamen inani ductus spiritu iurisdiccioni huiusmodi contraveniendi non veritas, ipsam perturbando contravenisset et contravenit mandatis et iussionibus sew iussis reverendissimi domini Mathei archiabbatis eiusdem monasterii non obtemperando, tum in paricione sacrarum synodum pro recapitulatione reformacioneque virorum ecclesiasticorum ad eundem spectancium proximis annis iam evolutarum, in diebus suis congruis celebratis (!) et sibi prius semper, ut decuit, enodatarum non comparuisset, debitam eius obedienciam per hec contaminando, et neque census sue ecclesie prefate Zarzo debitos, ab evo statutos ipsi monasterio de iure et consuetudine reddere recusasset et denegasset usque in presenciarum, ductus spiritu se alienandi a iurisdiccione pretacta ipsius monasterii, instinctu et exortacione quorundam dominorum canonicorum ecclesie Sancti Nicolai confessoris prepositure minoris Albensis dyocesis Wesprimiensis pretacte. Ac eciam quod vina decimalia eiusdem possessionis Zaarzo unius anni integri ad sepefatum monasterium sex vasorum de iure spectancia et pertinencia de eodem per plebem eiusdem possessionis vetasset absque iuris processu et prohibuisset, ymmo ipsis vinis ipsum monasterium spoliasset et spoliavit cum effectu. Super quibus omnibus, quamlicet quod fuisset iuris ordine requisitus, et tam citacionibus, quam ammonicionibus spiritualibus canonice premissis ad obediendum, obtemperandumque se super premissa neglecta atque satisfaciendum de ablatis, tamen disuasionibus quorundam sibi superinde disuadencium plus aquiescendo, nil curando ea omnia neglectus fuisset usque in presenciarum. Tandemque postremo pro his omnibus et singulis prescriptis suis neglectis et non curatis iuris ordine et canonice excommunicatus, aggravatus et reaggravatus fuisset, ipseque assertus plebanus censuras ipsas usquemodo pervidendo sub eisdem censuris ipsum, ut premittitur, spiritualibus censuratis et oneratis in discrimen salutis sue, preiudiciumque iuris canonici omnia divina officia et sacra(men)ta ecclesiastica usque ad presens administrasset et administrare non cessasset, non formidans exinde gravamen note irregularitatis incurrere et incidere. In cuius fassionis et rei veritatibus (!) hoc presens cum nostris sigillis, quibus utimur, munivimus concripsimusque, et consignamus, feria quarta proxima post festum Beati Barnabe apostoli, anno Domini millesimo quingentesimo quarto. [1504. jún. 12.]