Iulius episcopus servus servorum Dei ad perpetuam rei memoriam. His, que pro fidelium, presertim religiosorum ac illorum monasteriorum quorumlibet statu salubriter dirigendo et conservando concessa dicuntur, cum a nobis petitur, apostolici muniminis adiicimus firmitatem.||
Sane pro parte dilectorum filiorum moderni abbatis et conventus monasterii Sancti Martini Montis Panonie, Romane ecclesie immediate subiecti Ordinis Sancti Benedicti Iauriensis diocesis nobis nuper exhibita peticio continebat, quod dudum felicis recordacionis Pascalis, Gregorius III. Alexander eciam III., Clemens, Urbanus, Iohannes, Inocencius, Zacharias, Honorius et Benedictus XII. Romani pontifîces, predecessores nostri ac eciam Romani imperatores et clare memorie Stephanus et alii necnon carissimus in Christo filius noster Wladislaus modernus Ungarie illustres reges, aliique principes ac eciam bone memorie Guido, tituli Sancte Cecilie et dilectus filius noster Petrus, tituli Sancti Ciriaci in Thermis, presbyteri cardinales in illis partibus aplostolice sedis legati et alii prelati ecclesiastici eisdem abbati et conventui eorumque antecessoribus a fundacione dicti monasterii citra guamplura privilegia tum super possidendis decimis et aliis bonis tam per ipsos reges, quam alios Christifideles eis concessis seu largitis et donatis ac recipiendis bonis ad monachos dicti monasterii quomodolibet pertinentibus et de eis libere disponendi, quam de certis fructibus certarum villarum per tunc abbatem dicti monasterii sua industria acquisitarum in certos usus pauperum et infirmorum convertendis ac capituli generalis pro omnibus abbatibus et prelatis dicti Ordinis celebracione et visitatorum cum plena facultate deputacione et predicti ac aliorum eciam monasteriorum reformacione et facultate mittendi duos monachos ad studium et cum monachis in regularibus dicti Ordinis dispensandi eosque absolvendi potestate ac dicti monasterii abbati et aliis tribus abbatibus in dicto capitulo generali deputandis visitandi, corrigendi, puniendi et reformandi, quos duxerint puniendos et reformandos auctoritatis et potestatis concessione, quodque abbas dicti monasterii pro tempore existens a quocunque episcopo ad iudicium trahi seu ipse et illius monachi suspendi vel excommunicari aut interdici preterquam a Romano pontifice vel eius legato de latere indulto aliasque libertates, gracias, immunitates, indulgencias et indulta concesserunt, prout in diversis eorum literis desuper respective confectis dicitur plenius contineri.||
Quare pro parte abbatis et conventus predictorum nobis fuit humiliter supplicatum, ut privilegiis, libertatibus, immunitatibus, graciis, indulgenciis et indultis predictis pro eorum subsistencia firmiori robur apostolice confirmacionis adiicere ac alias in premissis oportune providere de benignitate apostolica dignaremur.||
Nos igitur, qui singulos sub religionis iugo Domino famulantes libenter prosequimur favore gracie specialis, privilegiorum predictorum premissa concernencium tenores acsi de, verbo ad verbum presentibus insererentur, pro expressis habentes, abbatem et conventum prefatos ipsiusque conventus singulares personas a quibusvis excommunicacionis, suspensionis et interdicti aliisque ecclesiasticis sentenciis, censuris et penis a iure vel ab homine quavis occasione vel causa latis, si quibus quomodolibet innodati existunt, ad effectum presencium duntaxat consequendum harum serie absolventes et absolutos fore consentes, huiusmodi suplicacionibus inclinati omnia et singula privilegia, libertates, immunitates, gracias, indulgencias et indulta predicta, quatenus sunt in usu auctoritate apostolica, tenore presencium innovamus, approbamus et confirmamus supplemusque, omnes et singulos defectus, si qui forsan intervenerint in eisdem, ac perpetue firmitatis robur obtinere debere decernimus et inviolabiliter observari mandamus. Non obstantibus constitucionibus et ordinacionibus apostolicis ac monasterii et Ordinis predictorum iuramento, confirmacione apostolica vel quavis firmitate alia roboratis, statutis et consuetudinibus ceterisque contrariis quibuscunque. Nulli ergo omnino hominum liceat hanc paginam nostre absolucionis, innovacionis, approbacionis, confirmacionis, supplecionis, decreti et mandati infringere vel ei ausu temerario contraire. Si quis autem hoc attemptare presumpserit, indignacionem omnipotentis Dei ac Beatorum Petri et Pauli apostolorum eius se noverit incursurum. Datum Rome apud Sanctum Petrum anno incarnacionis dominice millesimo quingentesimo quinto, nono Kal. Februarias, pontificatus nostri anno tertio. [1505. jan. 24.]