Nos Clemens Zarka de Dergeczezenthpethewr, vicecomes et iudices nobilium comitatus Wesprimiensis damus pro memoria, quod, cum nos die datarum presentium una cum iuratis sedis nostre assessoribus in sede nostra iudiciaria pro faciendo iudicio causantes pro tribunali sedissemus, nobilis Blasius de Chathar exhibuit et presentavit nobis quasdam litteras nostras citatorias hunc tenorem continentes:||
Nos Clemens Zarka de Dergeche Sancti Petri vicecomes et iudices nobilium comitatus Wesprimiensis memorie commendamus, quod, cum nos ad instantiam et legitimam petitionem nobilis Barnabe Fwrko de Kayar Valentinum Iora de Chayag, unum ex nobis iudicem nobilium ad infrascriptam citationem faciendam de sede nostra iudiciaria nostro pro testimonio duxissemus destinandum; qui tandem exinde ad nos reversus retulit isto modo, ut ipse ad feriam quartam, ad festum Beati Barnabe apostoli proxime preteritum [1505. jún. 11.] accedens ad possessionem Kayar, ibique de possessione abbatis de Beel Kayar vocata, in comitatu Wesprimiensi existens, habita, providum Benedictum Zabo, iudicem iobagionum videlicet dicti domini abbatis de Bel contra annotatum exponentem ad feriam quartam prescriptam sedis nostre nunc venturam nostram citasset in presentiam, litis pendentia, si qua foret inter ipsos, non obstante. Datum Wesprimii, feria quarta proxima preterita, in festo Beati Barnabe apostoli, anno Domini millesimo quingentesimo quinto. [1505. jún. 11.]||
Quibus exhibitis mox nobilis Paulus Czepely in persona domini Blasi, abbatis de Beel, paria earundem litterarum nostrarum citatoriarum per nos sibi dari et concedi postulavit. Unde nos inclinantes petitionibus dicti Pauli Czepely tanquam iustis et legitimis paria prescriptarum litterarum citatoriarum inscribi fecimus et eidem duximus concedenda. Datum Wesprimii, feria quarta proxima post festum Nativitatis Beati Iohannis Baptiste, anno Domini supradicto. [1505. jún. 25.]