Iulius, episcopus, servus servorum Dei, venerabilibus fratribus archiepiscopo Strigoniensi et episcopo Milkoviensi ac dilecto filio preposito ecclesie Strigoniensis salutem et apostolicam benediccionem. Conquestus est nobis Matheus monasterii Sancti Martini Montis Pannonie Ordinis Sancti Benedicti Iauriensis diocesis et dicti Ordinis in regno Hungarie abbas generalis, quod Petrus Chaholy, qui pro clerico et perpetuo commendatario monasterii Sancti Egidii de Simigio, dicti Ordinis Vesprimiensis diocesis, se gerit, nonullos monachos per ipsum abbatem, ad quem deputacio monachorum in dicto monasterio expectat, in illo recipere ac deputatos in eodem monasterio ab illo de facto expellere et in dicto monasterio monachis existentibus alimenta et alia eis necessaria, ut tenetur, administrare ipsique obuedienciam (!) prestare in debito recusare presumpsit et presumit. Ideoque discrecioni vestre per apostolica scripta mandamus, quatenus vocatis, qui fuerint evocandi et auditis hincinde propositis, quod iustum fuerit, appellacione remota decernatis, facientes, quod decreveritis per censuram ecclesiasticam firmiter observari. Testes autem, qui fuerunt nominati, si se gracia, odio vel timore subtraxerint, censura simili appellacione cessante compellatis veritati testimonium perhibere. Quod si non omnes his exequendis potueritis interesse, duo aut unus vestrum ea nichilominus exequantur. Datum Rome apud Sanctum Patrum, anno incarnacionis dominice millesimo quingentesimo sexto, tercio decimo Kalendas Iulii, pontificatus nostri anno tercio. [1506. jún. 19.]