Nos Iacobus abbas et conventus ecclesie Sancti Mauricii de Beel memorie commendamus universis et singulis presentes inspecturis, quod nos inducti multimodorum fidelium servitiorum horum circumspectorum virorum, videlicet Francisci et Simonis Hanthay de Papa, non solum suorum servitiorum, sed potius servitiorum parentum et predecessorum suorum, qui semper fidelissimi servi huius ecclesie Sancti Mauricii extiterint, duo molendina abbatie nostre Beel Agiaklik vocata in fluvio Tapolcza ab aquillino inter molendinum egregii Francisci Essegwar, cognomina Odoska vocatum, a meridionali parte inter molendinum magnifici domini Gregorii Vasoni similiter Agiaklik vocatum sita et habita, quorum molendinorum ipsi predicti Franciscus et Simon Hantay adhuc a primatibus eorum heredes fuerint, licet aliquantisper ab hereditate iam dicta fuerint alienati, cum regnum Hungarie a Germanis vim patiebatur ob conbustionem molendinorum et funditus eversionem iam dictorum. Quia pre inopia rursus edifficare nequiverunt, sed reverendus dominus Ladislaus, tunc abbas predicte ecclesie existens, recogitans dampna ecclesie quanta ex destructione molendinorum evenirent, suscepit constituendos duos carpentarios, scilicet Lucam et Iohannem Molnar de Papa, florenis XXXII, ut molendina iam dicta pretio edifficarent; quos, perfectis molendinis eisdem conventus iam dicte ecclesie solvit et de omnibus laborious eorum eosdem contentos reddiderit. Deinde auctores et magistri dictorum molendinorum ex versutia et duritia eorum insimul hereditare non valuerunt et Lucas prefatus alterum, scilicet Iohannem, evexit expellendo et ex sua parte eundem faciendo. Tandem Lucas magister iam dictus ex donatione abbatis eiusdem temporis existentis molendina prefata gubernavit hereditarie parumper, sed casu aliquo ex sua rebelli contumatia et ex ira sui abbatis a predictis molendinis se fugitum et alienum fecit. Tandem, ne molendina iam dicta secundo deserta starent conventus ecclesie prefate hos iam pretactos, scilicet Franciscum et Simonem Hanthay ad se accersiri iussit et reverendus dominus Michael, abbas illius temporis monasterii predicti, predictis, scilicet Francisco et Simoni Hanthay, ex consensu conventus una voluntate tradidit, concessit et donavit iure perpetuo, etiam libertate in filios filiorum, heredum per heredes in hunc modum, ut Franciscus et Simon Hanthay ante ingressum molendinorum coram conventu monasterii deposuerunt florenos XXXII, quibus conventus molendina iam dicta edifficare fecerat, hoc vinculo adiecto, ut quilibet abbatum predicti monasterii in negotio et grandis (!) edifficiis molendinorum, ut puta in purgendis locis fluvii vulgo gathcothras et in emendis sindris, aliis quoque licitis sublevare et adiuvare teneantur, tandem si quispiam eosdem et suos posteros commoveret et excitaret molestandos, ex tunc ipsa ecclesia cum conventu eosdem, scilicet Franciscum et Simonem Hanthay et suos posteros, semper tuere et defendere teneatur. Est autem concessum de proventibus annualibus eorundem molendinorum in arendam quadringenta in volutione cuiuslibet anni a festo Corporis Christi incipiendo, item libones etiam quadringentos, quos in tribus terminis solvere teneantur, videlicet in Pasche, ad Vincula Sancti Petri et ad festum Natalis Domini. In cuius rei memoriam et nos premeditantes actiones et donationem predecessorum nostrorum dedimus, concessimus et donavimus eadem auctoritate et vigore predecessorum nostrorum confirmando, has quoque presentes nostras litteras sigilli nostri munimine roboratas duximus dandas. Datum in Beel, in festo Corporis Christi, anno Domini millesimo quingentesimo octavo. [1508. jún. 22.]