Wladislaus Dei gracia rex Hungarie et Bohemie etc.||
Venerabilis et religiose frater fidelis nobis dilecte! Multe et prope infinite sunt et in dies graviores emergunt necessitates ad negocia varia et multiplicia regni illius nostri inevitabiliter quidem expedienda, ad quas nobis ultra pecunias presentis nostri subsidii eiusdem regni, quarum bona vel pocius maior pars adhuc ante tempora ipsius subsidii per contractum mutui absumpta est, nobis pluribus pecuniis opus omnino existit, plane namque vobis omnes ferme necessitates regni nostri note sunt et aperte, pro quibus levandi et commodius expediendis ex fiducia illa nostra singulari, quam in vobis locatam habemus, pro contrahenda nomine futuri mutui aliqua summa ad vos certa spe necessarioque recurrendum duximus, magnopere fidelitatem vestram hortantes, ut considerata magnitudine huiusmodi necessitatum presencium regni ipsius nostri, velit nobis exnunc mille florenos nomine mutui ad racionem proxime futuri subsidii nostri nobis de bonis vestris proveniendis disponere et ad manus fidelis nostri reverendi domini Francisci electi ecclesie Waciensis, thezaurarii nostri dare et assignare, quam quidem summam in ipsa futura contribucione nostra licebit vohbis de bonis vestris et ecclesie vestre propriis ad racionem nostram exigi facere, que si forte in eis integre non expleretur, pollicemur nos eciam aliunde vos ad plenum contentaturos et integre pecunias vestras vobis exoluturos. Itaque rogamus et omnino vobis committimus, ne ulla in hoc excusacione utamini, sed racione condigna condicionis presencium rerum nostrarum habita nobis in hoc complacere et summam ipsam in effectu dare curetis, aliud minime facturi. Datum Prag in vigilia Purificacionis Beate Virginis Marie, anno Domini millesimo quingentesimo decimo. [1510. febr. 1.]||
Wladislaus rex manu propria scripsit.||
[Címe:] Venerabili et retigioso fratri Matheo, abbati Sancti Martini Sacri Montis Pannonie, fideli nobis dilecto.