Nos capitulum ecclesie Iauriensis memorie commendamus tenore presencium, quod nobilis Michael Kalthy de Kalthaza ad nostram personaliter veniens in (!) presenciam onera et quelibet gravamina cunctorum fratrum, proximorum, filiorum, filiarumque et consanguineorum universorum, quos infrascriptum tangeret, aut quomodolibet concernere et tangere possit negocium, super se levando et assumendo sponte et libere maturaque in se deliberacione prehabita confessus est in hunc modum: Quomodo ipse certis et salubribus ductus racionibus totales suas porciones possessionarias in possessione Kalthaza ac in prediis Bodontheleke et Felsewkalththeleke vocatis intra metas possessionis Kalthaza in comitatu Wesprimiensi existentibus habitis simulcum cunctis earundem utilitatibus et pertinenciis quibuslibet, terris scilicet arabilibus cultis et incultis, agris, pratis ad sexaginta falcastra et quasi ultra se extendentibus, pascuis, silvis, rubetis, nemoribus, montibus, vallibus, aquis, fluviis, piscinis, piscaturis aquarumque decursibus, molendinis, molendinorumque locis, vineis, vinearumque promontoriis, generaliter vero quarumlibet utilitatum integritatibus quovis nominis vocabulo vocitatis ad dictas possessiones porcionarias totales de iure et ab antiquo spectantibus et pertinere debentibus, que videlicet aput manus egregii Sandrini de Darocz hactenus sexaginta florenis Hungaricalibus perpetue empcionis titulo habite fuerint, sed quia predictus Sandrinus rehabitis predictis sexaginta florenis eidem Michaeli Kalthy predictas possessiones possessionarias et predia remisit et resignavit, quas tandem reverendus dominus Matheus abbas et conventus monasterii Sancti Martini Sacri Montis Pannonie a dicto Michaele iterato emissent et in sortem et concambialem permutacionem rerum bonorumque subscriptorum, eisdem videlicet reverendo domino Matheo abbati totique conventui dedisset et concambialiter perpetue et irrevocabiliter permutasset. E converso autem ultra hoc dicti, dominus Matheus abbas et conventus prefato Michaeli Kalthy de sepefata Kalthaza racione prescripte concambialis permutacionis unam domum seu fundum curie in oppido ipsorum Zenthmarton alias Alsok vocato sedecim florenos valentem ac unam vineam in promontorio eiusdem viginti florenis emptam et florenos viginti quinque simili concambiali permutacione dederunt, adiuncto eciam, quod reverendus dominus Matheus abbas et conventus memorati eousque, quoad videlicet iidem Michael Kalthy et domina Anastasia consors eiusdem vitam fungerentur unum vas vini viginti tinas continens et quattuor currus feni eisdem singulis annis dare debent et tenentur. Non eciam hoc pretermisso, quod post mortem eorundem Michaelis dicti et domine Anastasie eedem domus et vinea in eosdem, videlicet dominum Matheum abbatem et conventum libere, pacifice et integre devolvant. Assumendo nihilominus annotatus Michael Kalthy de predicta Kalthaza memoratos reverendum dominum abbatem et conventum in quieto et pacifico dominio predictarum porcionum possessionariarum contra quosvis impetitores, causidicos, actores protegere ubique et in eisdem conservare cum literis et privilegiis opportunis et necessariis defensare propriis laboribus et expensis harum nostrarum vigore et testimonio presencium mediante. Datum in festo Invencionis Sancte Crucis, anno Domini MDXI. [1511. máj. 3.]