Thomas, miseratione divina tituli Sancti Martini in Montibus sacrosancte Romane ecclesie presbiter cardinalis Strigoniensis ac patriarcha Constantinopolitanus, primas Hungarie et apostolice sedis de latere legatus etc. dilecto nobis in Christo venerabili et religioso fratri Iacobo, professo ordinis Sancti Benedicti abbatis, salutem et paternam in Domino benedictionem. Zelus religionis et vite sanctimonia, aliaque preclara probitatis et virtutum tuarum merita, quibus personam tuam ab Altissimo preditam cognovimus, exigunt, ut ad ea libenter intendamus, per que tui honoris proveniat incrementum et ecclesia, cui preficieris, tua providentia in observantia religionis feliciter in Domino gubernetur. Sane vacante nuper de iure et facto abbatia ecclesie Sancti Mauricii de Beel, iurisdictionis nostre spiritualis Strigoniensis, serenissimus princeps et dominus dominus Wladislaus, rex Hungarie et Bohemie etc., auctoritate iuris patronatus sui regii, te, exigentibus tuis meritis, ad dictam ecclesiam Sancti Mauricii per litteras suas patentes subinsertas in pergameno sub secreto sigillo suo impresso confectas elegit, nominavit et presentavit. Quarum tenor talis est:||
Nos Wladislaus, Dei gratia rex Hungarie et Bohemie etc., memorie commendamus tenore presentium significantes, quibus expedit, universis, quod nos inducti vita, virtutibus et meritis ac regularis observantie salutari disciplina fidelis nostri venerabilis et religiosi fratris Iacobi, professoris ordinis Sancti Benedicti, quibus idem apud maiestatem nostram fide digno testimonio meruit commendari, eundem igitur tanquam personam idoneam et benemeritam ad abbatiam ecclesie Sancti Mauricii de Beel, nunc, ut dicitur, de iure et de facto vacantem, auctoritate iurispatronatus nostri regalis, quod generaliter in omnibus ecclesiis regni nostri instar predecessorum nostrorum divorum regum Hungarie habere dinoscimur, duximus eligendum, nominandum ac illi, cuius interest, pro canonica institutione et confirmatione presentandum; eandemque abbatiam simul cum universis possessionibus, villis et cunctis aliis bonis et iurisdictionibus eiusdem ecclesie eidem fratri Iacobo pleno iure dandam et conferendam, ita tamen, quod idem in ipsa ecclesia abbatie de Beel pro cultu divino in eadem peragendo sufficientes semper fratres eiusdem ordinis alere et tenere et alia omnia, ad que idem ex debito et instituto ipsius ordinis tenetur, diligenter observare, facereque observari et pro viribus suis reformationi quoque eiusdem abbatie et ecclesie incumbere debeat et teneatur; immo eligimus, nominamus et presentamus, damusque et conferimus harum nostrarum vigore et testimonio litterarum mediante. Datum Bude, feria sexta proxima post dominicam Iudica, anno Domini millesimo quingentesimo duodecimo, regnorum nostrorum Hungarie etc. anno vigesimo secundo, Bohemie vero quadragesimo secundo. [1512. ápr. 2.]||
Unde suplicasti nobis humiliter, ut tibi ad effectum huiusmodi oportune providere et electionem, nominationem et presentationem prefatas de te ad dictam abbatiam Sancti Mauricii factas admittere, necnon de eadem abbatia ac iuribus et pertinentiis eiusdem tibi auctoritate nostra ordinaria providere, teque in eadem canonice instituere et confirmare dignaremur. Nos quidem cupientes ecclesias et monasteria iurisdictioni dicte ecclesie nostre Strigoniensi subiectas, presertim ubi regularium viget disciplina, viris religiosis, qui preesse sciant et prodesse committere, confisi de tua vita laudabili, ut dictum monasterium providentia tua in ruinis reformetur, atque regulari observantia salubriter et honeste gubernetur, itaque tuorum consideratione meritorum suplicationibus tuis paterne inclinati electionem, nominationem et alia premissa de te, ut prefertur, ad dictam abbatiam Sancti Mauricii factas admittendo, acceptando tibi eandem abbatiam ac regimen, iuraque et pertinentia eiusdem duximus conferenda et de eisdem providenda, tenoreque presentium admittimus, acceptamus, conferimusque et providemus, necnon invocata Spiritus Sancti gratia te in eisdem in Dei nomine canonice instituimus et confirmamus ac per birreti nostri capiti tuo impositionem personaliter investimus, curam et omnimodam administrationem eiusdem ecclesie et abbatie in spiritualibus et temporalibus plenarie committendo, recepto tamen a te iuramento corporali ad sancta Dei evangelia manibus tuis tacta prestito, quod nobis et nostris successoribus archiepiscopis legittime intrantibus ac nostris et eorum vicariis pro tempore constitutis fidelis et obediens eris, necnon nuntiis et visitatoribus ab ecclesia nostra Strigoniensi prefata ad te forsan divertendis obedientiam et reverentiam debitas exhibebis, dicteque ecclesie et abbatie in spiritualibus et temporalibus per te ac bonos idoneos in numero decenti et honesto iuxta exigentiam facultatem dicti monasterii conservandos fratres dicti ordinis sufficientes laudabiliter inservies; quodque iura, res et bona iam fate ecclesie et abbatie non alienabis, neque distrahes, sed alienata et distracta, si que forent, ad ius et proprietatem eiusdem restitues et restitui procurabis tuo posse. Quo circa venerabilibus et religiosis fratribus conventus, ceterisque omnibus et singulis subditis prefate abbatie, tam scilicet ecciesiasticis, quam secularibus, in virtute sancte obedientie harum serie firmiter precipiendo committimus et mandamus, quatinus ipsi visis presentibus te in et ad realem, corporalem et actualem possessionem iam dicte abbatie Sancti Mauricii recipere et admittere, tibique in cunctis licitis et honestis reverentiam et obedientiam debitas et devotas, fidelitatemque solitam ac iura et servitia ab eis debita exhibere, necnon de universis fructibus, redditibus et proventibus, iuribusque et obventionibus pretacte abbatie, quantum in eis fuerit, integre respondere et responderi facere debeant et teneantur locis debitis et temporibus semper oportunis, contradictores quoscunque auctoritate nostra per censuram ecclesiasticam compescendo. In quorum omnium et singulorum fidem et testimonium premissorum presentes litteras nostras per notarium publicam infrascriptum fieri ac publicari mandavimus, nostrique sigilli fecimus appensione muniri. Datum et actum Bude, diocesis Wesprimiensis, iurisdictionis vero nostre Strigoniensis predicte, anno Domini millesimo quingentesimo quartodecimo, indictione secunda, die vero quarta mensis Aprilis, [1514. ápr. 4.] hora tertiarum vel quasi, pontificatus sanctissimi in Christo patris et domini nostri domini Leonis, divina providentia pape decimi, anno eius secundo, presentibus ibidem honorabili magistro Wolfgango de Lempach Pathaviense, canonicoque et custode ecclesie Posoniensis ac nobili Georgio de Monozlo, Zagrabiensis diocesum (!), testibus idoneis ad premissa habitis et requisitis.||
Et ego Stephanus, natus Martini Karih de Olazy, terre Scepusiensis, Strigoniensis diocesis, publicus sacra apostolica auctoritate notarius, prefatique reverendissimi domini Thome cardinalis Strigoniensis, patriarche ac legati apostolici etc. scriba et secretarius, quia premissis collationi, provisione, confirmationi et investiture aliisque omnibus et singulis, dum sic, ut premittitur, coram eodem reverendissimo domino Thoma, cardinale Strigoniensi, fierent et agerentur, una cum prenominatis testibus presens fui, eaque sic fieri vidi et audivi, ideo de mandato eiusdem domini cardinalis hoc publicum instrumentum manu mea scriptum exinde confeci, subscripsi et in hanc publicam formam redegi, signoque et nomine meis solitis et consuetis una cum appensione sigilli eiusdem domini cardinalis consignavi et roboravi in fidem et testimonium omnium et singulorum premissorum rogatus et requisitus.