Sacra et gratiosissima regia maiestas. Vestre supplicatur regie maiestati in persona venerabilis et religiosi fratris Iacobi, abbatis ecclesie de Bakonbeel, quomodo quedam causa inter ipsum supplicantem ab una, ut actorem ac nobiles Valentinum litteratum de Chaytha, provisorem castri Iauriensis, necnon Georgium litteratum vicecomitem ac iudices nobilium et alios certos nobiles ipsius comitatus Iauriensis ab alia partibus ratione et pretextu occupationis cuiusdam possessionis ipsius abbatis supplicantis Tharyan vocata in eodem comitatu Iauriensi existenti habita et per litteras preceptorias et exhibitorias vestre maiestatis in presentiam eiusdem vestre maiestatis evocati extiterunt; tamen ob prorogationem omnium causarum regnicolarum vestre maiestatis et ipsa causa ipsius abbatis exponentis prorogata est. Quare presentibus humillime et devote supplicatur in persona, ut prefertur, eiusdem abbatis exponentis, quatinus predictam possessionem ipsius supplicantis Tharyan predictam usque decisionem cause in curia vestre maiestatis deductam medio tempore dignetur eadem manibus domini abbatis Sancti Martini Sacri Montis Pannonie, tamquam ad manus convenientes dare et designare facere gratiose, ne exinde ipse abbas et ecclesia sua patiatur dampnum aliquod; dignetur eadem ex sua benignitate et dementia finem debitum et relationem facere gratiosam.