In nomine Domini amen. Per hoc presens publicum instrumentum cunctis pateat evidenter et sit manifestum, quod anno a Nativitate Domini MDXVII. indiccione quarta, die vero quarta decima mensis Februarii [1517. febr. 14.] hora octava, pontificatus siquidem sanctissimi in Christo patris domini et domini Leonis divina providencia pape decimi anno quarto in mei notarii publici testiumque infrascriptorum ad hoc specialiter vocatorum et rogatorum presencia personaliter constituti reverendi in Christo patres domini Matheus Sancti Martini Sacri Montis Pannonie et Paulus Pechwaradiensis monasteriorum abbates in ipsorum ac ceterorum dominorum abbatum in hoc regno Hungarie constitutorum veluti principalium ab una, ex altera vero partibus venerabilis et religiosus pater Petrus Croatus abbas monasterii Sancte Margarethe virginis de Bela proposuerunt et asseruerunt eo modo, quod ex quo his superioribus temporibus elapsis idem dominus Petrus abbas contra annotatos dominum Matheum Sancti Martini predicti tanquam principale caput et membrum ac legitimum patronum prefati monasterii Sancte Margarethe de Bela ac Paulum Pechwaradiensem abbates in idem monasterium Sancte Margarethe veluti vocatos proficisci volentes non intromiserit, ratione non intromissionis excesserant certe lites, differencie, licium amfractus, controversie et questiones mote fuerunt et suboriri debebant ac ventillari, idemque dominus Petrus abbas ex eo in notam infidelitatis incurrere ipsaque abbacia sua privari ac secludi cognoscebatur. Tamen iidem abbates ex utroque parte cupientes pro decore eciam, honore et ornamento Ordinis Sancti ipsorum licium amfractus evitare et huiusmodi discordias ex integro mortificare et extinguere, ac alios, quos propter litem ipsam subituri forent parcere laboribus et expensis, intervenientibus super his nonnullorum earundem parcium, eciam magne auctoritatis communium amicorum tractatibus gratis, sponte, non coacti, nec in aliquo circumventi et nullo metu, sed, ut ex utraque parte iidem domini abbates dixerunt, spontanea eorum voluntate omnibus melioribus modo, via, iure, forma et causa, quibus melius, tucius et efficacius debuerunt et potuerunt, convenerunt, tractaverunt et amicabiliter sub condicionibus, articulisque et obligacionibus infranotandis per eundem dominum Petrum abbatem similiter sponte et nulla coaccione ac metu mediantibus suo iuramenta ad sancta Dei evangelia dextra manu sua sacrosanctam scripturam in manibus mei notarii publici infrascripti, tanquam publice et autentice persone et sinistra sua manu pectus suum corporaliter tactis ac salutem et fidem suam Christianam et consciencie sacerdotis obediencieque sancte dignitatis puritatem amissioneque et privacione eo facto, si infrascripta non observaret, honoris humanitatisque et abbacie sue predicte observaturum promissis convenisse retulerunt. Imprimis quod quam diu idem dominus Petrus prefatam abbaciam suam Sancte Margarethe de Bela tenuerit et possidebit, dictis dominis abbatibus et capitulis eorum triennalibus videlicet et annualibus parebit et obediens erit et ob maiorem caucionem et securitatem, castellanos et familiares per eosdem dominum Matheum abbatem et conventum monasterii Sancti Martini in castrum Bela et castellum Aparocz suorum et Ordinis prefati nominibus et personis locatos vel locandos, qui castellani et familiares promittant fidelitatem perpetuam prefatis dominis Matheo abbati et conventui Sancti Martini ac toti Ordini et ipsi patri Petro de fidelissima conservacione dicti monasterii Sancte Margarethe non eiiciet, neque permutabit, sed per eos fovebit et sallaria eorum exolvet et nihil mali contra eos machinabitur, tamen et ipsi castellani sint sibi obedientes et fideles fideliterque et reverenter in licitis tamen et honestis servient, dempto si contra honorem et preiudicium ipsius monasterii de Bela et dictorum dominorum abbatum et totius Ordinis agere cognoscerent, in quibus sibi minime obediant, quin pocius Ordini prefato revelent. Item preterea quod ipse dominus Petrus abbas nunquam se in episcopum titularem promovere vel a iurisdiccione et superioritate ipsorum domini Mathei abbatis et conventus monasterii Sancti Martini vel successorum eorundem per quospiam eximere procurabit, imo eciam, si que exempciones procurate forent, sponte idem dominus Petrus revocavit, cessit et renunciavit. Ceterum, quod absque voluntate et consensu dominorum abbatum vel deliberacione capituli nunquam se confirmari faciet et neque extraneos homines vel stipendiarios ad se defendendum contra eosdem dominos abbates, conventum et Ordinem in dictum castrum de Bela et castellum Apurocz introducet et neque superflua comitiva preterquam sex vel octo equitibus incedet et quod divinum cultum et numerum fratrum iuxta exigenciam proventuum ipsius monasterii de Bela augebit, bonaque ipsius monasterii non alienabit, colonos quoque, iobbagiones et prediales ipsius monasterii in iuribus et antiquis eorum libertatibus servabit. Quodque dum prefati domini abbates, potissimum dictus Matheus abbas vel suus successor legitimus patronus dicti monasterii de Bela in dictum monasterium Sancte Margarethe ire vel ingredi voluerit, claves dicti castri Bela et castelli Aparocz simul cum castellanis eiusdem ad quartam partem unius milliaris Hungarici vel ad minus ad possessionem seu oppidum Bela coram ipsis deducet et in manibus ipsorum vel illorum, quorum ipsi domini abbates voluerint, tradet et tradi faciet. Item quod dum idem dominus Petrus abbas nutu divino ex hac luce se decedere agnoscet, nemini preterquam prefato domino Matheo abbati et conventui Sancti Martini vel successoribus eorundem castrum Bela simul cum castello Aparocz et pertinenciis eorundem reservari comittet, prout ipsi castellani super hoc iuramentum prestabunt. Item quod hec supra dicta et alia omnia pro utilitate et commodo augmentoque et conservacione perpetua Ordinis et ecclesie de Bela agnoscet pro rato atque firmo quovis quesito colore et subterfugio effugato observabit, prout idem dominus Petrus abbas ultro, sponte, sinceriter, nulla coaccione aut metu, prout premissum est, sub premissa fide sua Christiana, consciencia et obediencia sancta observare promisit presensque instrumentum publicum manu sua propria et suo nomine consignavit. Super quibus omnibus premissis iidem domini abbates a me, notario publico infrascripto, unum vel plura publicum seu publica instrumentum seu instrumenta confici et fieri pecierunt, quod et feci officio meo requirente. Acta sunt hec et facta Bude in domo abbacie Sancti Martini predicti, anno, die, mense, hora et pontificatu, quibus supra; presentibus ibidem venerabilibus et religiosis fratribus Iohanne de Hewka, altero Iohanne de Pesth Ordinis Sancti Benedicti de monasterio Sancti Martini predicti professis, ac egregiis et nobilibus viris Nicolao de Pewkry, Sandrino de Darocz, Iohanne de Ewrkeny de Nagh Ech, Sigismundo de Babona, Nicolao de Kalthaza et Georgio Rawazdy testibus fide dignis ad premissa specialiter vocatis et requisitis.||
Et ego Ambrosius natus Petri Withez de Erchy iurisdiccionis spiritualis Wesprimiensis auctoritate apostolica notarius publicus etc.||
Ita est, ego frater Petrus, qui supra, manu propria subscripsi.||
His omnibus et aliis pro Ordinis et ecclesie ipsius augmento conservacione nos quoque Matheus Sancti Martini et Paulus Pechwaradiensis abbates nostris et omnium aliorum dominorum abbatum nominibus eadem fide, ut supra, promittimus in nullo ipsum dominum patrem abbatem et successores suos turbare aut quoquomodo impedire, imo fovere et protegere tanquam verum membrum Ordinis.||
Ita est, Matheus abbas manu propria subscripsi.||
Ita est, Paulus abbas manu propria.