Nos capitulum ecclesie Iauriensis memorie commendamus, quod nobilis Nicolaus Kalthy de Kalthaza ad nostram personalem veniens presenciam, astanteque sibi personaliter Mathia, annorum, uti nobis visum est, viginti vel eciam ultra, maiore videlicet. filiorum suorum, puta Petro, Oswaldo, necnon filiarum suarum, scilicet Petronella, Barbara et Anna, quorum omnium, necnon aliorum quarumlibet fratrum, proximorum et consanguineorum suorum, quos infrascriptum concernere posset negocium, si in subscriptis persistere nollent, onera et quelibet gravamina super se assumendo sponte et libere confessus est in hunc modum: qualiter alias, videlicet de anno Domini millesimo quingentesimo duodecimo in festo Beate Scolastice virginis et martinis tunc preterito [febr. 10.] venerabilis et religiosus frater Sebastianus prior claustri Sancte Marie Magdalene de Nadasd ordinis Sancti Augustini quoddam pratum seu fenile Fyzeegh vocatum, intra metas possessionis Kalthaza in comitatu Wesprmiensis existentis habitum, pro certa summa florenorum Hungaricalium reverendo Christo patri domino Matheo abbati conventus monasterii Sancti Martini Sacri Montis Pannonie iure perpetuo et irrevocabiliter dedisset, vendidisset et perpetuasset, prout de huiusmodi prati vendicione in aliis literis nostris per nos tunc superinde confectis clarius vidimus contineri, verum quamvis dictum claustrum tempore huiusmodi vendicionis et longe antea fuerit in possessione ac dominio prescripti prati seu fenilis ex testamentaria legacione nobilis quondam Michaelis Erkffy, ipse tamen Nicolaus pretendisset semper pretenderetque in eodem prato ius hereditarium habuisse et habere, sed ad eiusdem prati seu iuris sui in eodem habiti recuperacionem, obstante sibi paupertate sua, non sufficisset; nunc autem prefati dominus Matheus abbas et conventus, visa ac considerata paupertata sua, ad solam querulosam notificacionem dicti iuris sui nullo superinde ostenso privilegio, sed consciencias eorum exornerare volentes, si forte aliquid iuris ipse Nicolaus in eodem prato habuisset, octo florenos Hungaricales eidem Nicolao dedissent et persolvissent et insuper iidem dominus Matheus abbas et conventus eundem Nicolaum in tutelam et proteccionem eorum specialem recepissent et elegissent. Quapropter ipse Nicolaus prenominate vendicioni, alias, ut prefertur, per predictum fratrem Sebastianum prefatis domino Matheo abbati et conventui monasterii Sancti Martini Ordinis Sancti Benedicti facte consensisset ipsamque vendicionem per omnia approbasset, sed et totum ius suum, quod in eodem prato seu fenili undecunque et ex quacunque causa habere potuisset ac posset eciam in futurum, prenominatis domino Matheo abbati et conventui remisisset et relaxasset. Imo predictus Nicolaus unacum prefato Mathia, filio suo, a religiosis fratribus, Michaele de Somlyo et Benedicto de Papa, dicti Ordinis Sancti Benedicti professis in eorundem et prelibatorum domini Mathei abbatis et conventus nominibus cum procuratoriis literis eorundem coram nobis presentibus ac stipulantibus et predictos octo florenos dantibus et persolventibus perceperunt et levaverunt, qui quidem fratres Michael et Benedictus prenominatum Nicolaum modo prenarrato in tutelam predictorum domini Mathei abbatis et conventus receptum asseruerunt et nomine, quo supra, eciam receperunt. Quibus sic habitis dictus Mathias huiusmodi fassione predicti Nicolai patris sui consensit, ipseque Nicolaus vendicionem predicti prati modo premisso per fratrem Sebastianum factam approbavit et ratificavit ac ius suum et per eum predictorum filiorum suarum, quod in eadem habuissent, seu habere potuissent, predictis fratribus Michaeli et Benedicto nominibus, quorum supra, presentibus, remisit et relaxavit. Preterea idem Nicolaus ob predicta et alia beneficia prefatorum domini Mathei abbatis et conventus in eum collata et que in posterum ab eisdem in se conferri sperat, promisit bona fide prenominatis fratribus Michaeli et Benedicto, quo supra, nomine presentibus, quod quandocunque prelibati dominus Matheus abbas et conventus porciones possessionarias nobilium Luce Kalthy et quondam Michaelis similiter Kalthy de Kalthaza, fratrum suorum condivisionalium, in eadem possessione Kalthaza ac prediis Felsewkalthaza et Bodontheleke in comitatu Wesprimiensi adiacentibus existentes, quas pronunc potencialiter et de facto detineret magnificus dominus Emericus Therek, banus Nandoralbensis, eosdem dominum Matheum abbatem et conventum certo iuris titulo concernentes, necnon predium seu particulam terre eiusdem Nicolai Cherge vocatum intra metas eiusdem possessionis Kalthaza habitum, ad quingenta iugera terrarum arabilium citra vel ultra se extendentem, quam in presenciarum nobilis Franciscus de Bank modo pretacto potencialiter ac indebite detineret, ab eisdem, domino Emerico Therek et nobili Francisco de Bank quacumque via, modo eliberare sibi ipsisque appropriare ac earundem possessionum nancisci potuerint, porciones videlicet prefatorum Michaelis et Luce Kalthy laboribus et expensis eorundem propriis, terram vero Cherge laboribus et industria eiusdem Nicolai, expensis autem dictorum domini Mathei abbatis et conventus, extunc idem Nicolaus fassioni predicti quondam Michaelis Kalthy iam diu de predicta porcione sua eisdem domino Matheo abbati et conventui, ut dixit, facte, dicti vero Luce in brevi, uti sperat, faciende consenciet et prenotate particule terre Cherge vocate directam medietatem simulcum omnibus utilitatibus et pertinenciis quibuslibet ad eandem spectantibus et ab antiquo pertinere debentibus prefatis, domino Matheo abbati et conventui iure perpetuo et irrevocabiliter tenendam et habendam dabit et concedet. Ita tamen, quod extunc iidem dominus Matheus abbas, vel interim nutu divino ipso de medio sublato ille, qui in eadem abbacia succedet et conventus eidem Nicolao suo et prefatorum filiorum filiarumque suorum qorum onera, ut prefertur super se assumsit, nominibus, quadraginta duos florenos Hungaricales dare et persolvere debeant et teneantur. Quod si autem idem Nicolaus premissa effectualiter adimplere quoquomodo recusaret, seu in aliquo contravenire niteretur, tunc idem Nicolaus in centum florenos Hungaricales ac estimacione predictarum porcionum possessionariarium dictorum Luce et quondam Michaelis ac terre Cherge nuncupate contra eosdem dominum abbatem et conventum ipso facto convincatur et convictus habeatur.||
Ad que premissa omnia et singula fideliter inviolabiliterque observanda prefatus Nicolaus dicto Mathia filio suo presente, audiente, intelligente et consenciente se obligavit. Voluerunt tamen et concordarunt coram nobis partes prefate, quod si prelibati dominus abbas et conventus, adepta possessione predictarum porcionum possessionarum prenominatorum Luce et quondam Michaelis, necnon medietatis terre Cherge, dicto Nicolao predictos quadraginta duos florenos Hungaricales persolvere nollent vel recusarent, extunc nec ipse Nicolaus ad prenotatum consensum super predictis porcionibus possessionariis Luce et Michaelis per eum, ut prefertur, faciendum ac dacionem medietatis dicte terre Cherge sit astrictus harum literarum nostrarum, quarum utraque parcium predictarum sub eadem forma verborum copiam sibi per nos fieri voluit atque tradi, vigore et testimonio mediante. Datum in festo Beati Gothardi episcopi et martyris. Anno Domini MDXVII. [1517. máj. 5.]