Nos Paulus, Pechwaradiensis, presidens generalis ordinis Sancti Benedicti in regno Hungarie constitute, necnon Iohannes, electus abbates Saxardiensis, vobis venerabili patri Iacobo, abbati Sancti Mauricii de Beel salutem in Domino sempiternam. Noveritis pro parte reverendi in Christo patris domini Mathei archiabbatis et conventus monasterii Sancti Martini Sacri Montis Pannonie nobis expositum fuisse, quod vos, pater Iacobe, necnon quosdam Emericum presbiterum alias plebanum de Koppan ac fratrem Paulum heremitam, nunc in ordine nostro in ipso tuo monasterio constitutum ac providum Simonum Ispan de Kayar, dyocesis Iauriensis, pro quibusdam certis infamiis, iniuriis quoque et dampnis per te et ipsos tuos illatis in presentiam reverendissimi in Christo patris domini et domini Thome, miseratione divina tituli Sancti Martini in montibus sacrosancte Romane ecclesie presbiteri cardinalis Strigoniensis ac patriarche Constantinopolitani, legati sanctissimi in Christo patris domini et domini Leonis divina providentia pape decimi de latere etc., citari et in causam convenire velle. Et ne rumor et infamia huiusmodi litigii in notitiam cunctorum in dedecus ordinis nostri veniret et vergeretur, rogavimus ipsum dominum Matheum archiabbatem, ne causam huiusmodi discussioni ipsius domini legati poneret, sed discussioni et revisioni nostre relinqueret. Qui dominus Matheus abbas petitioni nostre aquiescens, eandem causam discussioni, revisioni et determinationi ac finali conclusioni nostre, prout Dei iustitia requireret, reliquit et dimisit. Vobis igitur in virtute sancte obedientie et sub penis ac censuris omnibus ecclesiasticis firmiter mandantes, quatenus habita presentium notitia, tertio die exhibitionis presentium immediate conputando, ferimus in hiis scriptis, ut statim ipso tertio die a die exhibitionis presentium coram nobis hic Bude personaliter vos, pater Iacobe, conpareatis et sub eiusdem penis prefatos fratrem Paulum, Emericum presbiterum et providum Simonem Ispan tuos coram nobis vobiscum statuatis, rationem contra infamiam et iniurias prefati domini Mathei abbatis et conventus monasterii Sancti Martini nobis reddituri; nam aliter certi sitis, quod si secus facere attemptaveritis, vos per ipsum Matheum abbatem et conventum Sancti Martini in presentiam dicti reverendissimi domini legati vigore sue legationis citari, per ordinumque nostrum in generali capitulo nostro iam primitus celebrando omni iuris remedio ordinis nostri puniri. Et presentes has nostras una vobiscum ipso tertio die exhibitionis ipsarum nobis in specie presentetis. Datum Bude, nono die mensis Maii, anno Domini millesimo quinquagesimo decimo septimo. [1515. máj. 9.]