Nos conventus monasterii Sancti Martini Sacri Montis Pannonie memorie commendamus, quod venerabilis et religiosus dominus Iacobus, abbas monasterii Sancti Mauricii de Bakony Beel coram nobis personaliter constitutus sponte et libere confessus extitit in hunc modum, quomodo ipse pro quibusdam arduis totius ordinis Sancti Benedicti negotiis ipsum ordinem, singulosque dominos abbates ad presens sumpme urgentibus evitandis, ab egregio domino Stephano Iosa de Saul nomine veri mutui et sub spe restitutionis centum florenos auri in auro, veri et iusti ponderis Hungaricalibus, habuisset, mutuasset, recepisset, eosdemque ad festum Sancti Michaelis archangeli proxime affuturum [1518. szept. 29.] prenominato domino Stephano Iosa plenarie et integre similiter in auro persolvere promisisset et assumpsisset, immo promisit et assumpsit coram nobis tali vinculo interiecto mediante, quod, si memoratus dominus abbas annotato domino Stephano Iosa prescriptos centum florenos in auro terminum ad prescriptum persolvere nollet, non posset, aut quovis modo recusaret, ex tunc prenominatus dominus Stephanus Iosa solum vigore presentium et absque strepitu cuiuslibet iudicii in et ad ipsius domini Iacobi abbatis ac sui monasterii prefati totalem possessionem Sokorokayar vocatam, in comitatu Iauriensi existentem, intrandi et condescendendi, eandemque ex voluntate et consensu omnium et singulorum dominorum abbatum ac totius ordinis pro se occupandi ac tamdiu tenendi et possidendi, donec et quo usque dicto domino Stephano Iosa de prescriptis centum florenis auri satisfactum fuerit quo ad plenum, harum nostrarum vigore et testimonio litterarum mediante. Datum in festo Conceptionis Beate Marie virginis, anno Domini millesimo quingentesimo decimo septimo. [1517. dec. 8.]