Nos capitulum ecclesie Strigoniensis memorie commendamus per presentes, quod religiosi fratres Paulus de Buda custos ac Matheus de Thatha presbiteri Ordinis Sancti Benedicti in monasterio Sancti Martini Sacri Montis Pannonie degentes nostri personaliter venientes (in) presenciam in ipsorum propriis et omnium aliorum fratrum ipsius monasterii Sancti Martini nominibus et personis per modum protestacionis et inhibicionis nobis significare curaverunt in hunc modum: qualiter pridem reverendus in Christo pater dominus Matheus abbas dicti monasterii, nescitur quorum persuasionibus et consiliis circumventus quendam locum molendini in fluvio Saarvyze in comitatu Wesprimiensi situm et adiacentem, in cuius pacifico dominio dictum monasterium et consequenter fratres in eo Deo servientes semper ab antiquo et alias a tanto tempore, cuius inicii contrarium memoria hominum non haberet, perstitissent simul cum certis terris arabilibus ac feneto intra veras metas et limites eiusdem loci existentibus, aliis eciam cunctis utilitatibus ad ipsum locum pertinentibus venerabili domino Blasio Borchy, archidiacono Simigiensi et canonico ecclesie Wesprimiensis pro quadam exigua summa pecunie invitis dictis fratribus et contradicentibus, imo pluribus eorum absentibus et ignorantibus perpetue empcionis titulo inscripsisset et vendidisset et quod plus esset, idem dominus abbas literas vendicionis huiusmodi per quosdam fratres eiusdem monasterii, qui tunc presentes fuissent, sigillo conventus eorundem fratrum per vim et metum sigillari fecisset et procurasset in magnum preiudicium dampnumque et derogamen iurium ipsorum protestancium manifestum. Facta igitur huiusmodi protestacione iidem fratres Paulus et Matheus in ipsorum ac aliorum, quorum supra, nominibus et personis annotatas literas eorum revocarunt, cassarunt et irritarunt cassasque et irritas esse voluerunt coram nobis, memoratum eciam dominum Matheum abbatem a vendicione, impignoracione, permutacione et quavis alia alienacione dicti loci molendini, annotatum vero dominum Blasium Borchy et aliorum quoslibet ab empcione, occupacione et detencione seque in dominium eiusdem loci intromissione et sibi ipsi quovis titulo statui faccione et appropriacione usufructuumque et quarumlibet utilitatum percepcione seu percipifaccione, item serenissimum regem Hungarie ac successores eiusdem a donacione et collacione consensusque sui regii desuper adhibicione quomodolibet iam factis vel fiendis prohibuerunt contradicendo et contradixerunt inhibendo publice et manifeste coram nobis harum nostrarum vigore et testimonio literarum mediantibus. Datum feria tercia inter octavas Epiphaniarum Domini, anno eiusdem MDXIX. [1519. jan. 11.]