Sacra regia maiestas, post omnium nostrum, totius conventus, ad pedes maiestatis vestre humilem subieccionem et commendacionem. Quantis ecclesia ista quassatur a certis iam temporibus, spoliis, litibus, dolositatibus dampnisque, maiestati vestre nota sunt. Nemo succurrit, unusquisque rapit et vadit. Semper prosequi quis eos potest litibus? Si et lites ipse, -- non dico lites -- sed iusticie administratores prohibentur a prosecucione obtente cause, prout nuper quidam Hederwary, fide nos fraudare volens, in causam attractus, lata sentencia de satisfaccione non est permissa devenire in finem satisfaccionis, imo a sentencia excommunicacionis absolvere maiestas vestra fecit. Sacra maiestas, cum venia, cogor loqui. Non est officium maiestatis vestre absolvere et ligare. Pontificibus episcopisque ac sacerdotibus data est a Deo potestas et clavis, metus non facit ad rem. Maiestati vestre et aliis principibus datur sceptrum cum corona et gladio, ut feriat oppugnatores ecclesie Dei, episcopi habent ius consecrandi reges et peccata dimittendi virtute clavium. Sicque ille, qui sic est absolutus, est quidem apparenter, sed non coram Deo et ecclesia; non approbat Deus, quem non approbat ecclesia.||
Sacra Maiestas, quo sit fugiendum, ignoro, nisi ad solam maiestatem vestram, ad quam semper clamamus, cum sit maiestas vestra patronus huius ecclesie in temporalibus, papa in spiritualibus, ad quem immediate pertinet ecclesia. Patronus a patrocinando, ut auxilietur, tueatur et defendat ecclesiam, sicuti ceteri sancti reges et genitor maiestatis vestre fecit, ne devoret nos in toto spoliator ille. Sicque remittat, prout tenetur, ad delegatum iudicem et mandare eidem firmissime, ut usque ad finem cause agat et procedat irremissibiliter, donec ecclesie satisfactum fuerit, ne sic quottidie distracti a divino cultu expensis fatigemur, satis iam fatigati. De nostris proventibus syncopatum emit et nobis solvere non potest aut non vult; que iusticia hec est? Obligatur maiestas vestra ad hec ex officio patronatus sui et dignitate maiestatis regie facere omnibus iusticiam. Absorpti sumus pre nimia et continua tristicia et taliis (!) miseriis per fraudatores. Compescere dignetur eos maiestas vestra, obligatur per salutem suam sicque reddet Deo sacrificium dignum, quia suam ecclesiam et plebem tutata est, Parati sumus sine lite astare iudicio maiestatis vestre, modo prius rehabeamus nostra; sub cuius pedibus et defensione rursus et perpetuo commendamus. Ex maiestatis vestre capellani abbas cum conventu Sancti Martini.