Ludovicus Dei gracia rex Hungarie et Bohemie etc. fidelibus ... domino Georgio archiepiscopo Strigoniensi etc. ... comiti Laurencio duci Bozne, iudici curie nostre, item prothonotariis et comitibus comitatuum atque aliis universis et singulis iudicibus ... Expositum est nobis in personis fidelium nostrorum venerabilis Mathei abbatis et conventus monasterii Sancti Martini Sacri Montis Pannonie quomodo ipse ac predecessores sui abbates minus caute ac male informati certa bona dicti monasterii quibusdam personis vendidissent atque alienassent, unde ipsa abbacia et Sancti Martini non mediocre accepisset incommodum. Supplicatum itaque nobis est in personis eorundem abbatis et conventus, ut eisdem de remedio gracioso superinde provideremus ... Volentes indempnitati prefate abbacie et conventus pro iure et officio patronatus nostri consulere, id ex gracia nostra annuimus et concessimus, ut dicta bona per divos reges precessores nostros aut alias quascunque personas dictis abbati et conventui donata et dedicata et successu temporum per eos utcumque distracta et alienata iuris ordine et processu repetere et reaquirere monasterioque eorum recuperare licite possint ac valeant. Quocirca committimus fidelitati vestre ... ut quandocunque per prefatum abbatem vel successores suos seu conventum Sancti Martini fueritis requisiti ... causas eorum et requisiciones predictas coram nobis assummere et non obstantibus quibuscunque fassionibus et obligacionibus super huiusmodi vendicionibus ac alienacionibus per eos aut eorum predecessores factis per omnia iuris remedia adiudicare et decidere ... debeatis ... Datum Bude, feria sexta proxima ante dominicam Iudica, anno Domini millesimo quingentesimo vigesimo tercio. [1523. febr. 2.]||
Relatio magistri Bernrardi cantoris Agriensis, secretarii regie maiestatis.