Capitulum Wesprimiensis ecclesie omnibus presentes litteras inspecturis salutem in Domino sempiternam. Ad universorum noticiam tenore presencium volumus pervenire, quod venerabilis vir Ieronimus abbas monasterii Tyhoniensis pro se et pro toto conventu eiusdem monasterii ab una parte, ac populi prefati monasterii de villa Bezpremzeleuse, quorum nomina infra presentibus litteris sunt inserta, ab altera parte coram nobis personaliter constituti, privilegiales litteras dictorum abbatis et conventus nobis exhibendo pecierunt, ut easdem in publicam formam nostri privilegii transscribi et redigi faceremus. Quarum quidem litterarum tenor talis est:||
Ieronimus, divina miseracione abbas, totusque conventus monasterii Tychoniensis omnibus Christi fidelibus, quibus presentes patuerint, salutem in omnium Salvatore. Religioso proposito conveniens esse dinoscitur Christi pauperes honere servitutis oppressos modis congruis relevare iustoque moderamine per graciam Liberatoris humani concesse fidelibus participes efficere libertatis. Hinc est, quod nos populorum nostrorum de villa Seleus, que sita est iuxta Wesprimium, quorum nomina sunt hec: Hodov, Seme, Andreas, March, Wydus et Fytha, quorum debitum extitit hactenus ad curiam domini regis quandoque proficisscentibus nobis victualia nostra propriis vehere curribus et per singulorum revolucionem annorum unius mensis spacio monasterio nostro ligna pro igne ac aquam defferre, multa fidelitate inducti et postulacionibus inclinati hanc de communi nostro iobagionumque nostrorum consilio et assensu duximus graciam faciendam, ut, quia iidem priorum respectu temporum ad parvum numerum sunt redacti terramque possident sterilem et multis incomodis expositam, pro prefatis serviciis suis de cetero per annos singulos septem singula pondera stateralis argenti nobis et nostris successoribus per singulas mansiones solvere teneantur, ab omnibus predictis obsequiis eorum liberati penitus et exempti, excepto dumtaxat descensu annuo, quem nobis dare debebunt, sicut usque nunc ipsi atque alii nostri populi consueverunt. Et hanc misericordiam, quam ipsis populis fecimus, ratam ipsis et inconvulsam conservari cupientes concessimus, ut neque per nos, neque per nostrorum quempiam successorum in perpetuum debeat immutari, nec iidem populi ad predictam curruum servicia possint conpelli, dummodo fidelitatem, cuius merito presentem obtinuerurit graciam, studeant inviolabiliter conservare. In huius igitur concessionis testimonium presentes litteras concessimus sigillorum nostrorum munimine roboratas. Datum anno Domini Mo CCo septuagesimo, [1270] fratre Petro priore, fratre Symone celerario, fratre Salomone, priore domus Sancti Nicolai de Vruzku, Petro, curiali comite in Zala, Bar, comite in Symigio, Roma, filio Nemel, ac aliis iobagionibus monasterii nostri existentibus.||
Nos igitur ad peticionem et instanciam predicti abbatis et populorum suorum memoratas litteras de verbo ad verbum, sicuti superius est expressum, transscribi et ad formam nostri privilegii inseri facientes, easdem eciam nostri sigilli munimine reddidimus communitas. Datum per manus magistri Bogezlai lectoris ecclesie nostre anno Domini Mo CCo septuagesimo, [1270.] reverendo in Christo patre et domino Paulo episcopo nostro, magistro Fauo preposito, Paulo cantore, Rugas custode existentibus.