Oliverius Sabinensis, Julianus Ostiensis, Johannesmichael Portuensis, Georgius Albanensis, Jeronimus Penestrinensis, Episcopi. Dominicus tituli sancti Clementis, Paulus tituli sancti Sixti, Baptista tituli sanctorum Johannis et Pauli, Laurentius tituli sancte Cecilie, Antoniotus tituli sancte Praxedis, Johannes tituli sancte Susanne, Bernardinus tituli sanctorum Marcellini, et Petri Johannes tituli sancte Sabine, Johannesantonius tituli sanctorum Nerei et Archillei, presbyteri. Franciscus sancti Eustachii, Raphael sancti Georgii ad velum aureum, Johannes sancte Marie in Aquiro, Ascanius sancti Viti, Federicus sancti Theodori, Julianus sanctorum Sergii et Bachi, Dominicus sancti Nicolai inter imagines et Alexander sanctorum Cosme et Damiani, diaconi, miseratione divina sancte Romane ecclesie Cardinales. ||
Universis et singulis Christifidelibus presentes litteras inspecturis, salutem in Domino sempiternam. Quanto frequentius fidelium mentes ad opera devotionis inducimus, tanto salubrius animarum suarum saluti providemus. ||
Cupientes igitur, ut parrochialis ecclesie sancti Oswaldi in Windberg, Pataviensis diocesis, ad quam sicut accepimus dilectus nobis in Christo venerabilis vir dominus Johannes Perger ex Haslach, parrochie eiusdem ecclesie clericus, nostrique Juliani, diaconi Cardinalis prefati camerarius, singularem gerit devotionis affectum congruis frequentetur honoribus et a Christifidelibus iugiter veneretur, ac in suis structuris et edificiis debite reparetur, conservetur, et manuteneatur, necnon libris, calicibus, luminaribus, ornamentis ecclesiasticis, et rebus aliis divino cultui necessariis decenter muniatur, ornetur et decoretur. In ea quoque divinus cultus augmentetur. Utque Christifideles ipsi eo libentius causa devotionis ad eandem ecclesiam confluant, et ad reparationem, conservationem, manutentionem, et alia premissa manus promptius porrigant adiutrices, quo ex hoc ibidem dono celestis gracie uberius conspexerint se refectos, supplicationibus prefati domini Johannis nobis super hoc humiliter porrectis inclinati. ||
Nos Cardinales prefati videlicet quilibet nostrum de omnipotentis Dei misericordia ac beatorum Petri et Pauli apostolorum eius auctoritate confisi, omnibus et singulis Christifidelibus utriusque sexus vere penitentibus et confessis, qui dictam ecclesiam in eiusdem sancti Oswaldi et jovis sancte cene Domini nostri Jhesu Christi ac pasce, resurrectionis eiusdem necnon tercie ferie rogationum, ipsiusque ecclesie dedicationis festivitatum diebus a primis vesperis usque ad secundas vesperas inclusive devote visitaverint annuatim et ad premissa manus porrexerint adiutrices, pro singulis festivitatum diebus predictis, quibus id fecerint centum dies de iniunctis eis penitenciis misericorditer in Domino relaxamus presentibus perpetuis futuris temporibus duraturis. In quorum omnium et singulorum premissorum fidem et testimonium presentes nostras litteras fieri nostrorumque solitorum sigillorum iussimus et fecimus appensione communiri. ||
Datum Rome in domibus nostris sub anno a Nativitate Domini millesimo quadringentesimo nonagesimo quarto, die vero vigesima octava mensis martii, pontificatus sanctissimi in Christo patris et domini nostri, domini Alexandri, divina providencia pape sexti, anno secundo. ||
P. Hentzel. ||
||
Transkription: Peter Peusquens