LVI.

1391. Jon. 5.

In Gotis Namen Amen. Wir Bolke von gotis gnadin herczog czu Opul czu Falkenberg vnd hirre czu Strelicz Tun kunt vnd bekennen offinlich in desim brive allin di yn sehen horin vnd lesin, das vor vns komen ist Niczcze scholtis von Wroskaw, mit wol bedochtim mute vmbetwungin mit guttir vornumft vnd volgesund, och mit rate seynir frunde die her czu der czeit bey ym hatte, bekant hat her habe vorkawft recht vnd redlichin uff eynen rechtin wedirkawff eyne marg geldis Jerlichis cinzis uff alle seym gutte das her hat czu 'Wroskaw vnd czu Gumprechtsdorf uff der Scholtissei do her recht czu hat Gelegin in dem Opulischin wichbilde vmbe czehen marg groschin Bemischir muncze Polnisehir czal, Heynczin von Belicz seyme swogir ym vnd seynen geerbin vnd rechtin nochkomelingin, den eins czu gebin vnd czu hebin uff den Nestin sente Mertins tag vnd dornoch Jerlichin als der briff gegebin ist vnd geschrebin. Were das sache, das der czins nicht Jerlichin gefyle uff sente Mertins tag alle iar, so mag der egenante Heyncze adir seyne nochkomelinge pffendin uff den guttirn czu Wroskaw vnd czu Gumprechtsdorff mit vnserm pffender den wir adir vnser anwaldin ym dorezu leyen wellin vnd sullin, vnd mogin di pffant vorkawfen adir vorseczin vor ir gelt vnd domitte thun glichirweyse sam sy alle recht domitte begangin hettin, vnd von dem obgeschrebin Niczcze scholtis vnd den seynen vngehindirt. Och sal die vorreychunge in allin eren stukin vnd artikiln vnschedlichin seyn vnsirs hirren recht das in vnd eren nochkomen herezogin czu Opul der Egenante Niczcze do wan thun sal als ym lande gewonlich vnd recht ist. Och mit crafte desis brives weyse wir den selbin Heyn czin vnd sein geerbin in den selbin czins czu Wroskaw vnd czu Gumprechtsdorf, mit Orkunde desis brives vorsegilt mit vnserm Ingesigil das an desin briff czu grossir sichirheit gehangin ist, der Gegebin ist czu Opul Noch Cristis geburte dreyczenhundirt iar, dornoch in dem eynen vnd Newnczigistin iare am nestin montage noch dem achtintage des heiligen lichnams tag. Do bey sind gewest die Ediln voltochtegin knechte Feczencz von Schrepo- wiez Burgraphe czu Opul', Feczencz Stral von Melowan, Niclos von der Odir vnd Reynhart von Bischoffzheym vnd Petrus von dem Czulcz dem wir desin briff bewulin czu schreibin.

Kleines rundes grünes Siegel; ein gekrönter Adler auf einem Helm, mit der Umschrift: sigillu. bolkonis. qvarti. ducis. opoliensis.

57