Jch Jorg Gall von Rudolffsekch ich beken fur mich vnd all mein erb(e)n vnd tun kund mit dem offen brieff aller menigkleich den er fur kumbt Als ich nach abgang meines lieb(e)n bruders Andre des Gallen von Rudolffsekch selig(er) gedachtnuss meine erbleiche leh(e)n offenbarleich in der lanndschran ze Labach hab beruff(e)n lass(e)n Also ist nu fur mich komen fraw Vrss Hannssen de Meinyng(er) eleiche hausfraw fraw Magdalenn jr Swester Cuncz des Hasen eleichs gemah(e)ll vnd weyland Agness(e)n jr peder swester kinder vnd patt(e)n mich das ich jnn gereichet zuuerleihen meiner lehenschafft aynen zehndt(e)n vnder dem klayn Kollenberg jn Mongespurg(er) phar geleg(e)n der nach abganng Jorgen Sokchs irs vatter vnd muett(er) erbleich an sy gefall(e)n ist des czehenndthalb huben sind das ich also getan hab vnd leich auch der vorgenannt(e)n fraw(e)n Vrssen Hannss(e)n des Meinyng(er) eleich(e)n hausfraw(e)n fraw(e)n Magdelen jur swester Cuncz des Hasen eleichs gemah(e)ll vnd weyland Agness(e)n jr peder swester kinder(e)n vnd all(e)n yer(e)n erb(e)n sun vnd tochter(e)n den obgemelt(e)n zehenndtt mit aller sein(er) zugehoru(n)g Allerley czehntleich recht(e)n gancz darab ze nemen wissentleich mit dem brieff alles das ich tun von recht darann leih(e)n schol kan od(er) mag vnd der vorgemelt Hanns Me+einyng(er) schol mir vnd mein erb(e)n an jrer statt die leh(e)n verdyenn vnd vns trew vnd gebartig douon sein als recht ist So gelob ich sew darauff treuleich ze schermen als lannd vnd lehensrecht ist in Krein Mit vrchund des brieffs v(er)sig(e)lt mit meines obgenantt(e)n Jorg(e)n Gall(e)n aygenn anhangend(e)n jnsig(e)ll Geb(e)n nach Christi gepurd vierczehenhundertt jar vnd darnach in dem suben vnd funffczigist(e)n jar an sannd Lucein tag

Source Fulltext: Ulrich Seelbach (Bielefeld)