Jch Ruedolf von Marchpurch vergih an disem priefe vnt tuon chunt allen den, die in sehent oder hornt lesen, daz ich mit wolbedahtem muote vnt mit guotem willen meiner hausfravn fravn Elspeten vnt aller vnser erben, ez sun oder tohter sein, vnt mit ir hant han geben meim sun Nyklaun ze seiner weyh den weingartten ob Prezzek, der weilen fravn Pruomen von Volchernmarcht gewesen ist, fur fumf march geltes vnt drey march geltes, die ligent in der stat ze Marchpurch: zdem ersten auf des pharrar haus von Sand Dyonisen sechs schillinge geltes vnt sibentzich phenninge geltes auf Hertwigs haus des schreiber vnt sechzih phenninge geltes, da Haintzel der smid auf sitzet, vnt ayn phunt geltes, da Gebhart der schuester ist auf gesezzen, vnt fumfzich phenninge geltes, da Zwatz in der Nevgazz / en i/st auf gesezzen: da mit ist der summe drey march geltes. Vnt haben im daz auf geben voer herm Bochen, dem pharrar von Marchpurch, also daz von vns noch von vnsern erben dahain chriech furbaz gewachsen schulle oder mug, vnt dar vmb lob wir im auch, swanne vnser niht enist, daz er dannoch geleichen erbtail haben schol mit seinen geswistroden. Vnt ist daz geschehen vor dem vorgenanttem pherrar von Marchpurch vnd voer seinen gesellen vnd vor andern erbaren levten. Vnd daz im daz stait sei vnt vnzerbrochen beleib, gib ich im disen prief ze urchunde der wrhait mit meim insigel vnt mit dern Wokchen insigel gesigelt, mit disen erbaren gezeugen: her Wulfinch, her Mainhart, her Johan der Pehaim, her Jacob, maister Hertweich, der schuelmaister, Chunrat der Pauch, Walther auf dem marcht vnt ander erbaer leut. Dieser prief ist geben, da von Christes geburt waren drevzehen hundert jar vnt in dem fumfzehendem jar der nach, es samsztags in den chottempern in der vasten.