Jch Haintzel, Haineichs sven des chramer in der Sawe, vnd ich Gretel, sein hausvrawe, vnd vnser payder erben veriehen, offenbar mit disem priefe vnd tuen chunt allen den, die in sehent, hoerent oder lesent, daz wir mit wolbedachtem muete vnd mit meins vater rate Mathen dem stat schreyber ze Marchpurch, seiner hausvrawen vnd ier payder erben redleich vnd rechte verchauft haben ein halb march gelts neuwer graetzer pheninng ze rechten purchrecht ewichleichen ze besitzen, di wir in jaerichleichen dien schullen des naesten suntags nah sand Oferten tag von vnserm hause, gelegen an dem marchte ze naest pey des Titschiczer hause, da man niht mer von dient nuer ainen helbinch dem hertzogen ze grunt rechte, vnd swaz in an der halben march gelts ab get auf dem hause, daz schuellen sev haben a uf vnserm weingarten, gelegen ze Raytz ze naest pey Mathes weingarten, Entzes aydem, da wir sev auf geweyset haben mit Oettleins hant des Teuffenpreyn, der sein du obrister perchmayster was, dem man da von dient dritthalb chuebel vnd einen helbinch ze perchrechte. Vnd hab wir in di halb march gelts verchauft wmb drey march silber, di machten nevn guldein vnd drev lot, da gevilen ze der zeit fuer sechstehalb march alter graetzer phenning vnd ain vnd vierczich phenning. Vnd schulle wir in da halb march gelts schermen auf dem benanten hause vnd weingarten vor aller ansprache, als der stat reht ist ze March, vnd als man saemleichen gelt ze rehte schermen schol. Taet wir das niht, welhen schaden, wie der genant sey, sev da von naemen, den ier ainz pey seinen trewen gesagen maeht, den lob wier in pey vnsern trewen gaentzichleichen abzelegen, daz schullen sev haben auf vns vnd auf alle dev, vnd wir haben. Vnd daz in ditz also von vns staet vnd vntzeprochen beleybe an allez gevaerd, dar veber geb wir im disen prief mit des erben manns Paltrams, ze den zeiten richter ze Marchpurch, anhangunden insigel, mit des hant diser chauf geschehen ist, wand er des benanten hauses du obrister hofherre was andes hertzogen stat, venter dem selben insigel ich Oettel der Teuffenprein, des benanten weingarten perchmayster vergih, wand ich selb niht aygens insigels han gehabt. Geschehen vnd geben nah vnsers herren Christs gepurd dreutzehen hundert jar, dar nah in dem vier vnd viertzigstem jare an sand Kathreyn tag.