Jch Gerdraut, Oettleins witweu des chuersner, vnd ich Chvenigunt ier swester vnd alle vnser erben wir veriehen offenbar mit disem priefe vnd tuon chunt allen den, die in sehent, hoerent oder lesent, daz wir mit wolbedachtem muete vnd ze der zeit, do wirz mit rehte wol getuon mochten, Maten dem schreyber ze Marchpurch, seiner hausvrawen vnd ier payder erben redleich vnd reht verchauft haben ain halp phunt gelts vnd tzehen phenning gelts neuwer graetzer phenning, als si geent ze sand Merten misse; des selben gelts ist ein halb march gelegen auf Puerch hause des weber, daz weylen des Indentags gewesen ist, gelegen ze naest pey des Trunchen Jacobs hause, vnd auf des Sluentze prottische vnd auf der stat, da der protisch auf stet, ze naest pey der Lantschreyberinn protisch ze Marchpurch in der stat sint gelegen fuemftzich phenning gelts, di man in jaerichleichen dienen schol des naesten suntages nah sand Merten tag vnd haben in den gelt verchauft ze rehten purchrechte mit allen den rehten, als er vnd gewesen ist, vnd wirn (!) haben inne gehabt, vmb zweillif guete guldein florin, der wir gaentzichleichen sein gaewert; vnd schuelle wir in den selben gelt schermen vor aller ansprach nah landes reht in Steyer. Taet wir des niht, welhen schaden sev des naemen, wie sev den naemen, den ier ainz pey seinen trewen gesagen maehte, den lob wir in pey vnsern trewen gaentzichleichen ab zelegen, daz schuellen sev haben auf vns vnd auf alle dev, vnd wir haben. Vnd daz in ditz also von vns staet vnd vnuerprochen beleybe an alle arge list, dar veber geb wir in disen prief mit des erben manns Jacobz des Gruedleins, richter ze Marchpurch, anhangunten insigel, mit des hant diser chauf geschehen ist, wand er ze den zeiten des benanten hauses vnd protischs obrister hofherre gewesen ist an des hertzogen stat vnd den wir vmb sein insigel fleizzichleich gepeten haben ze ainem vrchuend vnd ze ainer getzeugnusse der warheit. Ditz ist geschehen vnd ist diser prif geben ze Marpurch nah vnsers herrenChrists gepurd dreutzehen hundert jar in dem fuemf vnd viertzigstem jare, des naesten suntags nah sand Merten tag.