Ich . . Iohan genannt Wieshenne von Kutteche. Dun kunt allen luden unde bekennen offenlichen in disem bryve, dat ich bestanden hayn umbe die ersamen geistlichen lude unde herren den commenthuyr unde dy brudere gemeinliche des Du tschen huses zu Covelenze yren hoyf zu Lunneche veyr iar dy ane gaynt uf unser frauwen Lycchmesse dag der aller nehest kumit.

405

Myt alsulchen vorwurthen: dat sy mir sullent geben haylben samen unde sullent halben snyt don, unde ich sal in halden eynen herren unde eynen knecht myt eynem perde in myner koyst, biz der vorslach uz komit, umbe zwei malder kornis, unde ir dreschere ye den man umbe eyn summerere kornis zu der wo chen, voyr unde na, also lange sy es bedurfent; ouch sal ich in haylden zu der somerfrucht seys menschen, ilichen umbe eyn summerere kornis zu der wochen; den sollent sye Ionen; unde ich sal in antwurten al ire frucht zu Covelentze unde sal in dun zwo woren in der gegennoche wanne syes an mich gesin- nen; ouch sal ich ir lant wol gewinnen unde buwelich hayl den, unde geyn lant me gewinnen dan dat ir; vort me , wat cinse unde bede of den hoyf gevellit, dy sal ich bezalen. Were ouch sache, dat ich geynen schaden oder verlust hette van ymanne, des dy vorgenanten herren zu dagen wolden komen, des en sal ich in geyne vorderunge hayn. Unde dy werclude dy sie zu mir sendint, muren dach unde wende zu machen unde den hoyf in buunge zu hayldene, den solent sy lonen unde ich sal sy haylden an myner kost unde in opperen myt mynem gesinde. Unde of sy es noyt gewinnen, nuwen bov zu machene, da sal ich myne vore zu doyn. Ouch bekenne ich in disem geynwurtigen bryve, dat ich schuldig bin den herren vorgenant syben marc penninge Brabantsch unde nuentzwent- zich malder fruchte, myt underscheide, zwelf maylder roggen, eyn maylder gersten, vumfh maylder gemenget, unt eylf mayl der evenen, die ich bezalin sal, bynnen den vorgenanten vier iaren. Mit alsulcher vorwurte: in deme ersten iare, dat aller nehest kumftich is, sal ich bezalin den herren me genant eyne marg penninge, zwey mailder kornis der vorgeschribenen schulde; in deme anderen iare allernehest dar na vier mailder kornis, vumfh mailder evenen unde zwo marg penninge; in deme drit ten iare aller nehest dar na vier maylder kornis, vumfh mayl der evenen, zwo marg penninge; in deme vierden iare, deme letsten myner iayrzal, sal ich bezalen zwey maylder kornis, eyn maylder gersten, eyn maylder evenen, vumfh maylder gemengit unde zwo marg penninge. Zu eynem urkunde und sicherheit alle diser vorgeschribenen dinge hayn ich Iohann Wieshenne van Kutteche vorgenant gebedin den erberen herren mynen perrer zu Coveren, dat er durch mynes deinstes unde bede willen sin ingesigel an disen breyf wolle hayn. Unde wir der

406

parer zu Covern bekennen, dat wir durch . . Iohannes willen me genant unsers parremannes unser ingesigel an disen breif gehangen hain. Diser bryef wart gegeben na gotts geburte, do man schreif, druzehenhundert iair unde seys uude vierzich, des sonnentages vor unser frauwen liechtmisse dag.