Wir Ludowig von gotes ganaden romischer keiser, ze allen zeiten merer des riches. Enbieten den wisen luten . . den burgermeistern, . . den raten und den burgern gemein- lichn ze Strazburg, ze Mentze, ze Speyer und ze Worms, unsern liben getrewen, unser huld und alles gut. Uns habent kunt getan . . die Tutzschen herren uberal des ordens , daz ir si an den genaden und vreyheiten di wir in getan haben, daz si ir gut zolfrey den Rein ab sullen furen , engend und irrent und si damit nicht zolfrey wellend lazzen varen: welln und heizzen wir iuch vestichlichn, daz ir si an den vorgenan- ten genaden und vreyheiten, di wir in getan haben, furbas nicht engend noch irrend, also daz ir si ir gut zolfrey fur lazzend furen an irsalung, wan ir wellend, daz wir ew all genad und vreyheit, di ir von uns und dem riche habent, ouch staet halten sullen. Geben ze Franchenfurt, an vreytag nach sant Ioh. tag, in dem driw und zweinzigisten iar unsers riches und in dem zehendeu des keysertums.