Gebhardus dei gratia Pataviensis ecclesie episcopus omnibus in perpetuum salutem eternam in domino. Ad noticiam omnium presentem paginam intuentium cupimus pervenire, quod dilecti filii prepositus et capitulum Sancti Ypoliti, cum in ipsorum essemus ecclesia, ad nos accedentes dampnum suum familiare et frequentissimum coram nobis proposuerunt, hoc videlicet quod, cum ad horas matutinas ipsos surgere oporteret et linteamina seu alias vestes quas cum ipsis continue deferre non poterant super lectos suos relinquerent, vestes ipsas in dormitorio derelictas furto perdi assidue contingebat et adeo casus iste usitatus erat et frequens, quod iam nullus ipsorum secure vestes suas poterat relinquere, nec eas etiam poterant secum continue pariter absportare. Unde contingebat, quod idem fratres, cum rebus ablatis inhabiles essent effecti chori servitio, divinis se obsequiis subtrahebant, donec provisor eorum ipsis super rebus perditis de rebus communibus provideret. Unde eveniebat continue, ut et obsequiis divinis persone subtraherentur et communis camera super provisione cottidiana tot amissorum deficere cogeretur. Huic^a autem dampno taliter provideri posse credebant, quod lectum suum speciali clave posset quilibet reserare. Nos igitur deliberatione nobiscum habita diligenti in hoc facto, quid liceat, quid deceat et quid expediat, adtendentes, prima facie quod hoc expediret vidimus; sed quod liceret vel deceret non omnino videbatur, cum pretextu conservationis rerum temporalium per latebras et latibula et alia mala que per tales singularitates in lectis singulorum^b fierent,et que non licerent et que non decerent videbantur posse committi. Unde etiam rectores ordinis ipsorum hoc ipsis interdixerant in concilio anteacto. Nos autem paterna ipsis cupientes solicitudine providere et sic rebus ipsorum volentes consulere‚ ut nullatenus ob hoc vel offensam discipline vel periculum animarum incurrant, sic ipsis in hac parte providimus, ut liceat ipsis propter premissum rerum periculum speciales claves ad lectos suos retinere. Ne tamen aliquod latibulum sit hac occasione in lecto vel circa lectum, unde mala suspitio possit exoriri, volumus, ut paries qui dividat lectos ab atrio in modum eratis fiat sic in omnibus fenestratus‚ ut sic possit intus quicquit ibi sit vel fiat vel agatur videri tanquam si paries nullus esset; hostia etiam lectorum fiant similiter; item et in eundem modum paries brevior et qui distinguat lectum a lecto coaptetur, ut unus de suo lecto quid in alio sit vel fiat pervium habeat et apertum. Precipimus quoque, quod tales parietes nec pannis aliquibus ibidem suspensis nec modo alio obscurentur. Hanc autem licentiam memoratis fratribus concedimus non credentes ex hoc constitutioni rectorum ordinis eorum aliquatenus derogare; nam cum ideo hoc tamen prohibitum videatur‚ ne mali aliqua suspicio ex quibusdam latibulis inducatur‚ licet verba constitutionis eorum ex hac permissione videamur offendere, rectum tamen non offendimus intellectum, cum intelligentia dictorum ex causis sit assumenda, dicenda et,¹ ut dicit Ambrosius, ubi causa subest, vitium non imputatur. Hanc tamen ipsam permissionem seu indulgentiam ipsis facimus usque ad proximum concilium quod rectores sui ordinis sunt facturi. Ubi si ipsos hoc moverit, quod nos movit, idem ab ipsis in futurum poterunt obtinere; si contrarium visum fuerit‚ id observabunt quod ipsi circa bonum statum ipsorum viderint statuendum. Datum apud Sanctum Ypolitum, anno dominice incarnationis MCCXXIX,^c idus aprilis, indictione secunda, anno pontificatus nostri VIII, Gregorio papa nono.

Source Fulltext: LAMPEL, Urkunden Sanct Pölten (=FRA I, Wien 1981) S. 45-46